過去幾日嘅波盤，照睇盤口走勢有唔少人中伏，除咗洲際盃法國及巴西兩大強豪，令人跌到通地眼鏡之外，就連北歐波都似乎令唔少人輸錢，希望否極泰來，跟住呢個禮拜贏番啦！
洲際國家盃開始之前，大部份人都睇好法國，點知首戰佢哋只贏到哥倫比亞佬一粒而輸盤；前晚美國打頭陣，大圍見土耳其無咗幾件主將，係咁將美國受讓半球嘅下盤買到平手咁滯，又輸；跟手巴西呢支世界冠軍輸埋，莊家大勝！
就算「同場放映」嘅北歐波，先有夏卡輸通街，跟住赫爾辛基同埋邁柏亦有唔少亞洲盤客中招！呢兩隊開盤都係讓對手球半/兩球，不過就好多人唔信赫爾辛基，跌番落球半，邁柏個盤就企硬。結果，赫爾辛基大勝五比○；邁柏都贏，不過係一比○，賭友們慘矣！
如果真係畀周中一輪洲際國家盃及北歐波害得雞毛鴨血，嚟緊重有一輪西甲煞科。話晒大家玩咗成季，西甲波應該心水清啲嘞啩！梳打埠就已經提早開售各場盤口，皇馬同皇蘇都要讓球半以上。皇馬讓咁多都算係大眾盤口，但皇蘇贏都多數攞唔到冠軍，係咪可以讓到咁多呢？
列高巴係國米最高薪球員，但去季佢表現麻麻，球迷當然唔收貨，佢好明顯知衰，今季主動向會方提出減薪，而上個禮拜踢完對南韓場波後，繼續隨大軍返烏拉圭跟操，話要操弗自己迎接下季咁話喎。佢咁識做，相信國米躉都會對佢改觀嘞。
碧咸已經開始為西班牙生活做準備，喺馬德里市西北部買豪宅同家人定居，佢嘅阿爾德雷郡大屋就賣咗，連同早前喺法國又買屋，佢房地產動作嘅頻密程度都幾驚人。不過，最開心嘅莫過於佢個地產經紀，淨係佣金都發到儍，真係恨死日日喺到搵單生意都難嘅香港班行家囉！
巴西「細哨」朗拿甸奴及喀麥隆嘅伊圖，都係曼聯今夏「獵物」之一。咁啱兩人就喺前晚洲際國家盃對碰。「細哨」嘅表現就麻麻哋，反而伊圖就真係識得把握機會，喺呢場比賽打出身價波，風頭暫贏「細哨」！畀我係曼聯球探，都即刻為佢加分，即係話「細哨」去曼聯嘅機會又微啲囉！
公牛後衞積威廉士噚日發生電單車意外，搞到斷咗隻腳，要即刻送入院做手術，睇嚟佢嘅傷勢都幾大鑊。積威廉士今季嘅表現幾失望，𠵱家重炒車整跛埋隻腳，睇嚟佢下季喺公牛嘅地位岌岌可危。我求大俠祝佢唔好步一個同名同姓、前網隊中鋒積遜威廉士嘅後塵，因為斷咗隻腳而被迫提早收山啦！
逢周六、日見報