陳慧嫻日前在觀塘綵排個唱，其初戀男友區丁玉更專程到場探班，為她做義務顧問，慧嫻對此笑言自己是個霸道女人，毋懼現任醫生男友呷醋，她說：「呷乜醋啫？拍拖佢唔係大晒喎。」
陳慧嫻將於下月四至五日假紅館舉行一連兩場「陳慧嫻珍演唱會」，日前她在觀塘的藝能band房內，為個唱綵排。以前為慧嫻製作無數唱片的監製兼其初戀男友區丁玉，更專程到場探班，為慧嫻打氣，二人並大方合照。
雖然今次慧嫻個唱邀得「左麟右李」演唱會幕後人員做班底，但曾與慧嫻拍拖六載的區丁玉，卻甘願做義務顧問，問慧嫻可擔心現任醫生男友謝國麟呷醋？她笑說：「呷乜醋啫？獅子座（陳慧嫻屬獅子座）係霸道嘅女人，唔理㗎啦，拍拖佢唔係大晒，朋友都好緊要，呢次區丁玉係嚟聽吓啲音樂，畀吓意見，始終我有好多歌都係由佢製作，佢係freeofcharge（免費）做顧問。」
慧嫻與區丁玉分手十二年，至今仍能保持友好關係，確實難得，她對此說：「咁就要睇吓分手嘅時候分成點，我分手唔會同人嗌交，我好信緣份，拍拖嘅緣份盡咗，唔代表做朋友冇緣份，大家唔一齊係因為冇咗熱情，但友情就昇華咗，呢樣我都好開心嘅。」
此外，慧嫻表示個唱會以高貴及乾淨做主題，屆時會有一項她很喜愛的物件，被製成道具從舞台升起，她說：「呢次我會唱晒自己嘅經典金曲，會唱許志安嘅一首歌同一首英文歌，呢兩首歌會係我嘅心底話，我又有樣秘密武器，可以同晒四面台嘅觀眾玩，但𠵱家唔講得，如果唔係到時就冇驚喜。」
採訪：朱芷瑩
攝影：何國豪
