英格蘭龍門占士會響下個禮拜到美國參加美式足球訓練，藉呢項自己唔熟嘅運動改善球技。𠵱家香港生活環境麻麻，想生存就要付出，好似占士呢種自我增值行為，實在值得我哋香港人學習。
據講占士會隨邁亞密海豚隊操練一個禮拜，其間會學包括四分衞在內，幾個唔同位置嘅打法。雖然占士自己無講，但我求大俠相信佢此行最主要目的係改善接高球技術。以前有唔少人彈佢出迎接波技術麻麻，而雖然美式足球同足球唔同，但接高空波亦都好講究反應同埋彈跳時間配合，唔多唔少可以改善佢個人弱項。
講到尾，占士都想保住英格蘭國家隊首席龍門個位，值得鼓勵。
基爾禾後衞歷高達利前晚自爆，𠵱家只係差佢同祖記傾妥個人條件，轉會就成事。意國傳媒響佢講呢番話前幾個鐘頭，重講緊佢就快投羅馬，所以呢個消息都幾突然。祖記買人不嬲有一手，如果真係捷足先登買到呢件搶手貨，羅馬教練卡比路肯定激到嘔血。
碧咸一走，曼聯球迷最關注係加利尼維利嘅去向。好多人都認為佢同碧咸唔止老友，重係右路好拍檔，唇齒相依。近日佢就公開大讚領隊費格遜係世界最好領隊，又話會方賣碧咸無問題。咁識做，唔通佢都察覺自己處境麻麻？果然係世界仔。
巴治奧日前解釋佢唔離開布雷西亞，除咗因為踢得開心外，更重要係相信效力呢支中游球隊，可以幫佢達成射入二百球嘅目標。佢又話來季之後亦未必會收山，佢嘅擁躉大可安心啦。佢𠵱家累積一百九十三球，以佢狀況同決心，我求大俠覺得佢嚟緊一季都已經可達到目標。
早兩日前紐約人球員伊榮去到侯斯頓嘅火箭隊，面試助教一職。記者問佢對中國「高人」姚明點睇，佢立即話自己係姚明嘅擁躉，又預言呢位中鋒將會係下一個奧尼爾。吓，有冇咁誇啊，雖然姚明係可造之材啫，但論噸位同奧尼爾真係冇得比，正所謂仍需努力。伊榮𠵱家見緊工，可能只係買口乖都唔奇。
碧咸轉會新聞咁大單，各大傳媒都爭相報道，不過喺巴西就唔係咁有價值去報道咋喎！事關佢哋國內球會山度士，今年係四十年來首次打入南美自由盃決賽，呢支山度士就係以前球王比利打過嗰隊，巴西球迷都為此開心不已，傳媒當然當碧咸無到啦！