話咁快又一年，《蘋果》今日八歲生日。八方重閱去年今日篇稿，當時話「七年，二千五百五十幾日，睇番轉頭就好似前幾日咁……眨吓眼，香港已經改朝換代，董建華已經第二任，《蘋果》已經準備好再創刊──在台灣出一份日報。」現在台灣《蘋果》已經出版近兩個月，香港呢一年亦好大變化。
肥佬黎去咗台灣督師，八方好耐冇見佢；噚晚打長途電話去問吓佢八年有乜感想，佢竟然話「冇乜嘢好講！」肥佬黎話自己要在台灣睇住張新報紙，𠵱家係最辛苦嘅時候，不過慢慢就會掂。
咁香港呢邊呢？
佢答：「你哋搞囉」！重叫八方唔好搞佢。
咁有乜嘢同班同事講呢？
「多謝大家努力！」六個字，冇多冇少。
八年，差不多三千日，日日埋頭係咁做，真係犯過唔少錯，得罪過唔少人，有好多遺憾，有好多教訓，但始終有嘢寫都幾開心。
《基本法》二十三條通過在即，啲暗箭睇怕會變晒明刀，一把一把掛在頭頂；但願明年今日《蘋果》九歲時，繼續「隔牆有耳」，暢所欲言。
傳真︰2623-9278
電郵︰