黃霑年幾前因患上肺癌，在醫生建議下，已將癌細胞組織割除，霑叔昨日證實手術成功，身體已康復。昨晚他心情極佳地相約友人到灣仔福臨門吃飯，更自備鮑魚宴請友好。
昨日有報道指年屆六十三歲的黃霑去年曾患肺癌，但經過八個月的治療，現已康復。黃霑昨晚約七時十分駕車到灣仔福臨門酒家晚膳時，大批記者紛紛上前求證此事，他笑容滿面說：「咁都俾你哋等到呀！今日我係約咗丘亞葵（恒藝亞洲負責人）食飯，你哋要問嘅嘢，不如留番聽日先講，因為聽日一點鐘東亞娛樂都會同我開記者會。」經在場記者數番追問，霑叔最終承認說：「係！年幾前我的確有病，肺部有癌細胞嘅組織，已經割晒。」
而霑叔下月十八及十九日兩場的「學者靈芝黃霑獅子山下演唱會」亦會如期舉行，昨晚他為與工作人員傾談有關個唱事宜，更帶了鮑魚到酒家請客。霑叔表示年前動手術不是在私家醫院進行，不過手術相當成功，所以已無大礙，他說：「割晒啲癌細胞後，經過一輪休養，已經好番晒，好多人以為我戒煙係因為呢個病，其實有呢個病之前，我已經戒咗煙。好多謝大家關心，我真係冇乜事啦！」
此外，胡楓昨日在將軍澳電視廣播城化妝間，被問到有報道指霑叔早前患癌一事，他愕然地說：「冇聽佢講過，之前沙士嚴重嗰排，已經想打電話問候佢，而且想問吓佢演唱會搞成點。若果係咁，真係要打畀佢。」說罷胡楓即刻致電霑叔，欲求證其患病之報道，但對方的手電轉駁至傳呼台。
採訪：何永寧、娛樂突發組
