港股早市跌至5日線（現處9940）反彈，但升穿1萬點又遇沽壓，最後微升9點，收9980。趙飛雲望望周線圖，本周現時累升124點，只要今日不跌多過124點，恒指可平連升8周紀錄。
前日提過海域（1220）不宜跌穿1.38元，噚日走勢進一步轉差，在1.36元先沽出計數，計落仍要輸使費。按理海域化工（2882）快將上市，海域表現不應如此，經昨日一跌後，海域短線技術轉差，若連50日線1.31元亦失守，將下試1.26元。當然，這兩日跌勢唔排除係震倉或有大戶減持，就算已沽貨離場，亦要隨時準備重新上車。
意科（943）周三升至0.33元獲利回吐，噚日再考驗0.30元支持位，失守要計數。至於拍檔文化傳信（343）收0.237元，跌0.2仙，有下試20日線0.228元趨勢，若守穩，則整固有望完成。睇意科不妨睇埋文傳（343），唔排除雙雙完成整固後一齊開車。
噚日排隊掛牌2.975元買中糧（506），居然真係買到，希望是福不是禍，暫以跌穿2.90元收市作止蝕位。技術上，中糧10日線今日將升破20日線，形成黃金交叉，有助增加上升動力。經過海域及意科有胡唔食得個桔的教訓，中糧短炒目標價亦不宜定得太盡，在3.20-3.30元區域可伺機獲利。
趙飛雲