鄧健泓（Patrick）和妹妹小時候由外婆照顧，每年放暑假的時候，他都會探望遠在澳門工作的母親。由於與妹妹相處時間較多，所以她亦不幸地成為Patrick的整蠱對象。而「香港小姐選舉」，更是兩人童年時的玩意之一。
鄧健泓的母親在他小時候，因需要長時間留在澳門工作，所以他和妹妹都由外婆照顧。由於家中只有妹妹及二家姐，沒有兄弟作伴，所以頑皮的鄧健泓絕不會放過任何整蠱妹妹的機會。當回想起整蠱妹妹的往事，他都忍不住大笑地說：「我就最鍾意同佢玩香港小姐競選呢個遊戲，事前我都會同佢講畀佢做冠軍，咁就會叫阿妹到時一定要做一個好驚喜嘅表情。但我就特登喺宣布亞軍得主時讀出佢個名，搞到佢好失望兼且扁埋嘴，之後我會宣布自己係第一名，跟住就行上梳化度扮領獎。」
原來Patrick還會以一些特別方式去襲擊妹妹，他笑言：「記得我細個時好鍾意撩鼻屎，有一次我阿妹就瞓咗喺梳化上面，咁我就企喺佢前面撩，撩完之後就一手彈走嚿鼻屎，點知就咁啱飛咗落阿妹隻手度。佢睇睇吓就問我點解會有嚿綠色嘅嘢喺佢手上面。當佢知道係一嚿鼻屎之後就不停咁大叫，當時我都不知幾咁開心呀。」
此外，Patrick小時亦有不少鬼主意。有一次他想買一個機械人玩具，所以在利是錢中「抽水」，最後雖然如願以償，但詭計卻被母親揭發。他說：「因為個機械人要成二百幾蚊，咁細個又點會有咁多錢買玩具呀，咁我咪靈機一觸諗到『抽水』呢個方法。當我買咗個機械人之後，媽咪就問我邊度有咁多錢買，最終當然係俾人鬧咗一餐。」
採訪：李珮洳
