肥仔K喺美國讀咗幾年日文，為咗證明自己實力，去年特別報考一個「日本語能力試驗」（TheJapaneseLanguageProficiencyTest），因為滿懷信心，一考就考一級（Level1），結果及格，得到一張沙紙，名為「日本語能力認定書」。呢張沙紙由「日本國際交流基金」TheJapanFoundation與「日本國際教育協會」（AssociationofInternationalEducation,Japan）發出，好有權威性，肥仔K話佢嘅士哥係四百分之三百○三分（即七十五分左右），叫做中上，不過不失。佢嘅日文教授話肥仔K應該可以考到八十幾分，但因為考試前冇溫習，冇鋤書，已經算係咁。
肥仔K以為攞到張沙紙，可以有資格申請入日本大學。教授話：「非也，十年八年前，外國人考到就好威，但自從中國學生產生留日熱之後，搏命鋤書考呢個『日本語能力測驗』，成為考試機器，個個都考到高分。但到咗日本之後，原來好多人唔識講日文（考試只考文法、閱讀、聽），所以現在好多大學或僱主都唔多相信呢張沙紙咯，整定你唔好彩！」
肥仔K心諗，豈非得物無所用？當堂氣頂，因為佢暑假去東京旅行，全程做家人嘅繙譯全無困難，連的士佬都讚佢：「你啲日文講得咁好，喺邊度學㗎？」點知張沙紙會貶值啫。
中國大陸學生考托福，搞到美國大學頭暈；佢哋考日本語言能力試，又搞到日本人懷疑。中國人嘅考試威力、死背書嘅威力，橫掃全世界，可惜考試叻唔等於真係識吖！