恒指喺一萬大關篩來篩去，埋單有10點進帳。國內汽車股最出色，有Call輪發嘅只有駿威（203），駿威收3.625元，升10仙，創歷來最高紀錄。兩隻Call輪9701與9746有啲郁動，9701收71仙，升4.4%，今年11月到期，溢價2.3%，槓桿率5.1倍，現價博得過，只不過交投太靜，全日得13萬份易手。9746收市按盤價升11%，報0.61元，數據冇9701咁靚。
大藍籌中，利豐（494）養眼，收10.50元，升40仙，Call輪9438收15.6仙，升17%，隻輪10月到期，溢價3%，槓桿率6.7倍，溢價唔貴，跟正股升好應該。
德昌（179）收9.75元，微升1格。德昌通常都與利豐同進同退，利豐升，德昌短期都應該爬高幾格，除非利豐回番落去。德昌Call輪9731吼得過，8月底夠鐘，現價1.13元，溢價1.8%，槓桿率8.6倍，數據靚，弊在冇成交。
打入10大龍虎榜有隻海爾中建輪873，由5.5仙彈上6.2仙，升幅13%。隻輪並唔係因為正股（1169）帶動而上升，相反，正股跌3.3%。就算正股升啲，隻輪都唔應該跟住上。873明年2月到期，行使價52仙，正股𠵱家至做緊29.5仙，隻輪非常價外，溢價97%，幾乎1倍，而槓桿率又只得4.8倍。過多幾個月，好大機會隻輪變成1仙求售。
章盛