早前CAPCOM承諾為GAMECUBE獨家開發四款原創遊戲，第一款《P.N.03》口碑尚算不俗，第二炮就輪到今日呢隻《ViewtifulJoe》。遊戲以漫畫風格演繹，動作極為爽快兼多姿多采，主角化身超人後，重擁有如救世者Neo般嘅慢動作特異功能，避子彈之餘更有唔少必殺技。
記者：徐影龍
(C)CAPCOMCO.,LTD.2003ALLRIGHTSRESERVED.
遊戲基本上以橫向動作為主，畫面以充滿美式漫畫化表達，用色又帶有卡通味道，相當之創新吸引。看似平面嘅舞台，遇到特定劇情時，背景有時會360°咁轉動，又或從低角度向高望，令到2D玩法都充滿電影感。講穿咗，其實係類似《風之指揮棒》般用卡通式貼圖嘅3D處理。單單憑住創新畫面風格，當然不足以吸引機迷掏腰包，CAPCOM喺玩法上亦花咗唔少心思。首先動作Game必備一定要夠爽，試玩流程進度相當暢快，感覺更勝之前嘅《P.N.03》。
遊戲類型：動作
對應機種：GAMECUBE
遊玩人數：1人
售價：$380
開發商：CAPCOM
潮流興連續技，《ViewtifulJoe》入面最基本嘅嘍囉，都要打成十拳先消滅到，所以連續攻擊變得相當重要。除一般拳腳連續招式外，變身超人Joe重可發揮一種名為「VFX」嘅超能力，當中包含多款唔同用途嘅招式，如「MachSpeed」為時間加速，可一口氣衝前猛咁打敵人，拉近畫面嘅「Zoom」能力，並非齋睇Joe嘅英姿咁簡單，而係緊接使出像旋風腿般嘅必殺技，快速清理現場敵人。最正係連《Matrix》帶起嘅慢動作避子彈「Slow」都有，姿勢重鬼咁優美㖭，緊張氣氛中見佢重慢條斯理咁避彈，夠晒搞鬼兼惹笑。
試玩版只收錄一關舞台，難度亦唔算高，旨在畀你熟習系統同感受其魅力啫。單單完成遊戲唔算難，不過要快速消滅敵人同收集「V」就唔係咁易，對掌握VFX能力一次清除畫面大量敵人好重要，而且完全冇受傷情況下過關，重有額外「V」畀你㖭。至於「V」嘅用途，主要係過關後用嚟買各式道具、學習新必殺技等，情況同《P.N.03》大同小異。而據CAPCOM官方報道，集齊足夠數量嘅「V」，重有其他事件發生，至於係乜事就要等正式推出後先知喇。
雖然《ViewtifulJoe》延期至6月26日先推出，不過喺近期幾款GAMECUBE遊戲度，都附送一隻含有《ViewtifulJoe》嘅試玩版，等機迷可率先感受其獨特魅力。
又到送禮品益讀者時候，今次香港CAPCOM特別送出一百張《ViewtifulJoe》大海報，畀《打機樂園》讀者。老規矩，只要揸住今日本版，到灣仔188商場嘅DreamStore，就可免費攞到一張，每人限換一張咋，數量有限，送完即止。
售賣點：DreamStore
地址：灣仔東方188商場256號舖
查詢電話：25753285