八方噚日講過，下個月全港鄉村會開始選村代表，原來未選已經有混帳嘅事情發生，不過唔係咁快有黑社會晒馬，而係政府搞出嚟嘅胡塗事。
民政事務總署署長王榮珍噚日話，全港咁多條鄉村總共收到一千六百六十三個村代表候選人提名，有六成議席都可以自動當選，要選嘅議席只有三百幾個，不過就有一百零五個席位因為一個特別嘅理由，冇人可以參選。
呢個理由真係相當特別，政府喺提出選舉條例嘅時候都冇諗過。話說條例規定候選人要獲得最少五名選民提名，但原來有啲鄉村好少人住，登記選民甚至只有小貓三幾隻，全村數埋都唔夠選民提名，結果有關村落嘅村代表只有懸空。王榮珍話政府會喺全部選舉完晒之後，重新檢討睇吓點處理。
傳真︰2623-9278
電郵︰