容祖兒、葉蒨文（沙麗）、李克勤同譚詠麟噚日去紅館綵緋「凝聚每分光感謝大會」，林子祥（阿Lam）早排跌親，噚日現場就播咗段阿Lam嘅錄影片段，阿Lam話：「我好衷心多謝好多人同fans，我好快就會返舞台，我亦好多謝香港醫護人員，佢哋真係好值得敬佩，如果唔係佢哋，我都冇可能咁快出院。」
而沙麗話阿Lam嘅右耳重有少少塞，腦入面亦有少少積血。沙麗話：「我接到好多問候阿Lam嘅電話，就算我去打golf都有人走埋嚟問候。阿Lam覺得好感動，重親自設計咗張thankyou卡送畀關心佢嘅人。」沙麗重話𠵱家用中西合璧嘅方法去醫阿Lam，前日阿Lam第二次去照腦時，醫生話情況好過之前好多，瘀血重稀咗。
女子組合MiniCookies噚日喺新城電台接受訪問，不過Kary因為考試而冇出席。MiniCookies話遲啲會擔任Shine演唱會嘅嘉賓兼打氣，問佢哋驚唔驚到時觀眾會起哄要求天佑同Miki互咀，Theresa同Stephy即刻幫好姊妹Miki擋駕，話最多都係幾個女仔互咀。
嘉碧儀噚日喺清水灣電視城擔任葉文輝（啤梨）新歌MV嘅女主角，講開佢哋早前傳緋聞，嘉碧儀話唔會因為咁而尷尬。問嘉碧儀佢哋會唔會有親熱鏡頭，佢話：「唔知喎，公司叫我拍我就拍，即使有都冇所謂，都係為工作啫。」
趙頌茹（阿Yu）噚日接受商台節目《叱咤樂壇》訪問，佢話入咗行咁耐都未試過正式放假，最近終於可以放三日假。阿Yu話好想享受一吓陽光與海灘，問佢會唔會裸曬，阿Yu話：「如果裸曬梗係去法國啦！話晒都有天體浴，可以同其他人比較吓嘛。東南亞就唔好啦，好易俾人影相。」
名模周汶錡噚日接受新城節目《美麗週末》訪問，大談扮靚心得。對於男友杜德偉月底將就涉嫌藏有大麻一案再上庭，周汶錡就話到時唔會出庭，佢話：「我怕自己上到庭聽審會好緊張，不過呢件好小事啫，或者等案件完結之後先去慶祝一吓。」
