大市重好有力，在一萬大關爭持。今個升浪已升咗1700點，但高位仍繼續有資金流入，看來大市要調整，幅度亦好有限，雖然9600係大戶最着數嘅結算位，但唔係冇對手，真係要睇埋下禮拜，先知道邊便手瓜硬。
大市升咗咁多，已愈來愈多人睇淡，但大市跌唔落，好明顯有實力買盤繼續收集，目標係大藍籌同國企股，好似噚日，基金同大行就好主動咁買國企，馬鋼（323）同上海石化（338）成為主力嘅掃貨對象。前日大市成交101億，國企佔13億；噚日成交91億元，國企佔15.5億，基金咁樣買法，國企嘅調整期會縮短，整固完成後，下一個浪會升得更急。汽車股全面上升，華晨（1114）升勢最急，高收2.175元，升7.4%，基金收集完成，終於郁手，短期仍以2.4元為目標。另一隻上禮拜推介嘅浙江玻璃（739），升破大圓底頂部阻力後，急推上1.6元，出現後抽，前日落到圓底頂部獲得支持，噚日低開高收，且成交增加，整固好大機會已完成，升浪再起，目標1.8元。
平板玻璃行業今年由谷底回升，首季浙玻獲利比前同期大增2.1倍，達3360萬元人民幣，估計全年盈利1.45億元人民幣，每股盈利23.7港仙，預測PE8倍計，股價可見1.9元。
葉氏化工（408）03年度（3月年結）業績定下周三（25日）宣布，以近日的股價表現看，相信會為股東帶來好消息。葉氏近日曾升上1.82元，調整後噚日升勢再起，並升破降軌阻力，且成交大增逾兩倍，短期阻力1.82元，若升破，目標指向2.05元。
葉氏中期已報佳績，盈利6241萬元，大增97%，半年盈利已超逾02年度全年的6002萬元。受季節性影響，集團上半年度業績多比下半年為佳，但相差不會太大，估計03年度盈利可達1.2億元，增加1倍，每股加權盈利25仙，全年派息10仙，以8倍PE計，股價已可升上2.0元水平，而息率亦有5厘。集團目前在上海及惠陽興建新廠，已分段投產，上海廠房主要應付華東客戶的需求，預期04年度盈利仍可保持高增長。
香港華人（655）有消息（唔使講到明），要留意。
郭兆誠