雖然惠理基金向來鍾意工業股，但估唔到佢亦鍾意民企，大手購入的超大現代（682），噚日勁升24%，收1.13元，呢一鋪真係盡顯功力。
超大勁升，帶動一系列民企股一齊升，好似中國稀土（769）、浩倫（1073）等表現亦十分出色，但小初只係玩即日鮮，唔想學芬佬玩長線，因怕民企炒風只係虛火。
由於超大有芬佬買貨勁升，小初特別留意一些大手成交股份，德科科技（1228）噚日出現多宗造0.40元的非自動對盤大成交，計落超過成億股，小初懷疑可能同大股東減持畀芬佬有關。不過，德科收市下跌5.5%，收0.43元。
經紀陳話，德科批股傳聞講咗好耐，但一直未有成事，據講直至最近先至搵到人幫手，兼夾搵到人肯接貨，確係值得恭喜。
德科早兩個月公布全年業績唔差，賺成6236萬元，高層話要拓展液晶體顯示器業務，前景唔錯。只要有關人等肯畀心機包裝，德科有變成基金股潛質。
慕容小初