金鐘港麗酒店噚晚衣香鬢影，原來係英國駐港總領事館舉行一年一度嘅慶祝英女皇壽辰酒會，唔好以為英國佬已經撤退咗咁耐，其實佢哋喺香港重有好多威水子民。
李嘉誠爵士同大仔李澤鉅一早到咗，逗留一陣就同李國章局長齊齊離開，八方只有機會問到誠哥一句，點睇香港經濟？佢話：「前景好好。」真係大好友。
曾蔭權都係爵士銜頭人馬，佢噚晚係GuestofHonour，企喺台上同總領事何進爵士一齊舉杯祝酒；沙士咁厲害，當然亦要向醫護人員祝酒啦。
何進重喺現場爆咗兩單料：第一，佢老哥年底夠鐘退休；第二係馬會主席夏佳理攞咗個女皇勳章CVO（Commander,TheRoyalofVictorianOrder），僅次於爵士級。一聽咁好消息，八方想即場恭喜夏叔，點知佢已經去咗文化中心陪老董。當然夏佳理做咗好多嘢八方唔知，原來佢○○年接咗菲臘親王手，擔任全球愛丁堡計劃主席，又真係好唔話得。
傳真︰2623-9278
電郵︰