明年中旺角商廈巨無霸朗豪坊就會落成，到時整個社區會有好大變化，中原地產商舖部總經理潘志明更形容為革新年代，佢估計當一啲好似五金舖、麻雀館等撤離後，區內商舖租金同售價，至少有三成升幅，區內商場面對日漸劇烈嘅競爭，自然要想辦法搞搞新意思。
好似前身係華潤百貨，現在間細成二百幾間舖，每間一百到千五呎，走年輕人路線嘅潮流商場「新之城」，地庫落實租畀遊戲機集團，月租六十萬，一至三樓分別劃分成為時裝、精品，同售賣電話、電腦等高科技產品樓層，呎租七十至三百蚊，包管理費、差餉、同冷氣費（地庫同地下商舖除外）。
潘志明話，業主先推出四十間商舖招租，測試吓市場反應，第二期會喺暑假招租，租金重可能會提高㖭。事實上業主預期新之城翻新後，每年可以收到七千萬租金，較原本多一倍。
樓價連跌幾年，供應就有增無減，搞到發展商都冇心機起樓。政府最新公布數據顯示，主要承建商第一季完成嘅工程中，私人地盤建造工程價值，只得九十二億，比舊年同期少百分之七。
啲數字有乜微言大義，大家都心裏有數，建築工人要有心理準備，開工率可能會少啲嘞。舊年全年私人地盤嘅建造價值係四百二十三億，平均每一季約莫一百零億。
豪宅新盤搞推廣，格調份外高貴。好似恒基同新世界再度促銷麥當勞道11號，噚日就同HongKongTatler喺現樓舉行SummerMasquerade派對，重請到一百名城中貴人出席。個Show只係做一晚，由詩韻時裝店（SWANK）搞Catwalk，當然唔少得一眾女名模參與啦。
除名模搶眼之外，重有名畫展，六幅名畫來頭唔細。聽講，價值超過二百萬，畫家分別來自馬來西亞籍同埋緬甸。名畫由KarinWebberGallery提供，緬甸畫家Maeanayung以畫僧侶出名，是次展出嘅一幅，就價值十一萬美元。
因「沙士」而改期嘅上海房地產展，定於7月1號開幕，長實委託金豐鴻運喺當地代理嘅畢架山一號，係參展樓盤之一，聽講長實執行董事趙國雄重會到場參觀㖭。
一直熱烘烘嘅上海樓市，可能因「周正毅事件」發生，出現變數，但金豐鴻運就冇有怕，搞記者團，採訪上海房產展之餘，重會介紹埋公司喺上海嘅總部，一於乘機向外界展示吓實力。
樓價大跌為投資者製造短炒機會，炒賣氣氛又旺番啲。今年到本月17日，已經有二百五十一宗以確認人身份轉售個案，比舊年同期多三成二。
睇番利嘉閣嘅資料，最多短炒嘅一手樓，唔係乜嘢名牌屋苑，而係喺元朗上攸田近住朗晴居嘅雅妍花苑，總共有十宗，呢個只有三十六個單位嘅村屋盤，因為價錢平，所以先至有咁多炒賣，聽講轉售後嘅價錢，仍比市價低十萬蚊，幾乎可以炒多轉。第二位係有九宗短炒嘅上環帝后華庭，第三位係尖沙嘴擎天半島，有八宗。二手最多短炒係荔枝角美孚新邨，共有七宗。
蘭西
電郵地址：
