鄺美雲（Cally）名下的CallyJewellery珠寶店，店內有八成的珠寶均出自其手筆，鎮店之寶是一枚十六卡巨型黃鑽戒指，她認為珠寶應給人璀璨的感覺，有鼓勵人進步的推動力。談到大計，Cally打算年底於上海設店，在內地推廣香港的珠寶文化。
鄺美雲三年前以其名字在金鐘開設CallyJewellery珠寶店，設計出不少巧奪天工、美麗獨特的首飾。鄺美雲曾在紐約修讀珠寶設計，現時店內有八成的首飾均出自其手筆，比三年前開業時的三成設計量增加不少。
是次由名模歐陽妙芝示範其中的翡翠和鑽石精品，當中以一枚價值三百八十多萬元、重達十六卡的FancyDeepYellow巨型黃鑽戒指最耀眼，Cally說：「珠寶應該畀人見到佢嘅璀璨同閃耀生輝。珠寶亦係一種能力的象徵、財富嘅指標，亦有鼓勵人進步提升、改善生活嘅推動力，我覺得絕對係開心同正面，珠寶唔應該低調平實。」
談到設計心得，Cally說：「我嘅設計走歐洲風格，比較大件、線條誇張，唔會好subtle、好平凡不顯眼咁。選用嘅鑽石亦要好優質，夏天我會用色彩豔麗、鮮明嘅寶石。」
而今次示範的首飾珍品，誠是貴氣迫人、件頭十足，如一條以火燄為主題的巨型鑽石頸鏈，以及鑲滿紅寶石的立體玫瑰胸針，都充份展示Cally「豔光四射」的創作信念。談到大計，鄺美雲正籌備進軍內地，將於年底在上海開設第一間店，她信心十足地說：「其實之前做過幾次內地珠寶展銷，發覺潛質好大，𠵱家我希望搵一個二千呎嘅Gallerie舖位，將香港嘅珠寶文化同信息帶返內地。」
名模歐陽妙芝對其中價值近百萬元的翡翠玉珠頸鏈最心動，她說：「我一向鍾意鑽石，但自己膚色白，同翡翠嘅綠色好襯，戴起好突出。而且翡翠感覺特別天然同色彩潤澤，望落好舒服，好似充滿靈氣咁。」
曾任無數珠寶模特兒，歐陽妙芝卻永不言悶，她說：「每件首飾嘅設計、寶石同鑲工都唔同，全部都有個性，好有新鮮感。」現時歐陽妙芝正忙於為首次執筆寫書，將個人經歷與眾分享，她說：「本來預備書展出，不過寫唔切，今次主要係講我個人經歷，好似入行嘅困難、喜樂得失咁，𠵱家重忙緊儲相。」
採訪：DebbieLum
攝影：MatthewLam
示範：歐陽妙芝
化妝：NaviLamofOrientColorStudio
髮型：PaulHuiofLeColorbyPrivateiSalon
服裝提供：MaxMara
