日本女星經常奉旨拍寫真，喺鏡頭前着性感泳衣擺埋啲騎呢甫士，我大口羅拉都戥佢哋辛苦，不過，睇見靚女伊東早排為雜誌拍嘅一輯靚相，就感受到佢好鬼享受，實在可以令心情惡劣嘅人，睇完之後都成個開心番晒。
事關伊東今次唔使作晒索女狀影相，而係喺一部寶麗萊即影即有相機面前，自由自在咁任影，所以輯相就拍得好自然。我羅拉都係喜愛攝影之人，對寶麗萊都有啲研究，咪睇小即影即有相機好似好簡單，要拍得好，同玩Lomo相機一樣都係唔容易，都需要有番咁上下經驗先至拍出好效果。不過，伊東有專業攝影師藤代冥砂為佢揸機，效果當然好好，唔係都唔可以登出嚟見人啦。
伊東話拍呢輯寫真嗰陣，真係好鬼開心嘅一日。點解？因為佢今次同攝影師取景嘅地方，雖然都係喺東京區內，但一齊去一啲佢從未去過、充滿日本古式鄉村風味嘅地方，所以咪畀咗自己好大嘅新鮮感囉。伊東先後去咗壽司店、日式傳統嘅食肆邊拍照邊醫肚，除咗影低佢好誘人嘅食相外，又露個玉膊出嚟話自己食飽飽。而且食飽之後再喺旅館度又跪又瞓影低啲性感相，擺到明係製造一個只得伊東同看者嘅二人世界，嚟挑起麻甩fans嘅性幻想啦！