鄭經翰封咪事件表面係茶杯風波，但官府好緊張，因為呢個「小風波」，可能會破壞佢哋個電台風雲大計劃。
香港有三個電台，港台係官台，但一直頂心頂肺；商台更加唔畀面，批評政府不遺餘力，所以好多人都想閹咗呢兩間「人民喉舌」。
咁啱商台牌照明年到期，於是有人就向董伯獻計，希望將商台牌照期十二年縮短，例如改為三年。咁每次續牌就可以講數，不愁你唔聽話。邊個咁醒？其中一位咪梁振英先生囉。
阿董一向同商台老闆何佐芝老友，但扼殺不利政府言論咁大件事，老友都冇面畀。碰啱鄭經翰得罪高永文，班擦鞋仔重唔以為執到寶？呢類高舉正義道德大旗糾眾群攻之伎倆，八方都好清楚係點組織。
至於港台，八方聽聞聯通放聲氣想搞電台，班人就諗計cut港台兩三條頻道讓予第四個台。先畀個下馬威你，再唔聽話？你知點啦。講起聯通，佢哋係中國四大電訊商之一，又在港上市，財雄勢大，兼且羅致咗盧永仁博士，佢咁熟傳媒，要搞電台「依絲執」啦。
呢一幕電台風雲，目前尚在閉門密商，未上行會。唐英年係呢瓣嘅問責局長，你估佢做反派定正派呢？
傳真︰2623-9278
電郵︰