許志安小時候非常百厭，上音樂堂時唱歌故意走音，結果被罰，又聯群結黨偷摘石榴。性格硬頸的安仔有次自動請纓陪父母回鄉，怎料上錯賊車猛兜路，全家人又累又餓，安仔不禁嚎哭，最後更要父母安慰。
許志安歌喉好是不爭事實，原來以前安仔上音樂課時故意唱歌走音，惹同學大笑，最後當然被老師罰用手抬起椅子罰企，安仔日前說：「我特登㗎！因我細個幾百厭，又好鍾意引同學笑，咪次次唱到走晒音，但考試時就好好成績。」
安仔又大爆常與死黨偷偷用竹「撩」隔鄰學校的石榴樹摘石榴，安仔說：「我哋兩間學校只隔住個鐵絲網，嗰度有棵石榴樹，最記得我哋唔理個石榴熟唔熟都照食。有次我一咬個石榴，重見到有條蟲喺入面，即刻唔敢食。」
安仔是眾所周知的孝順仔，不過他最遺憾未能常伴父母旅遊，他說：「細個邊有咁多錢去旅行呀，大咗又冇咁多時間。不過講開旅行，我最記得十二歲嗰年，阿爸阿媽話想返鄉下番禺，我阿哥唔得閒，我咪請纓陪佢哋去囉。點知去到深圳上錯咗賊車，架車係咁兜路，由朝坐到晚都未到，三個人都好肚餓，最終搵到間食店，我入去問有冇嘢食，可能我太細個，根本冇人理我，最後忍唔住喊出來，要阿爸阿媽安慰番我。」
安仔其中一個偶像是張國榮，他參加完新秀歌唱比賽後便加盟華星，張國榮當時是華星旗下的歌手，安仔說：「嗰時哥哥（張國榮）生日，請咗我哋一班華星歌手去佢嘅生日party，我遲咗半個鐘，去到係咁同哥哥講唔好意思，佢重問我做乜咁緊張㖭！」 採訪：胡比
