恒指再創今次升市新高，去到10067，但後勁不繼，萬點大關得而復失，收9970，跌60點，升降指數已轉弱3日，大市再升力度有限，250日線係今次短期調整的重要支持位。
芬佬計過條數，話期權市場9600嘅好淡倉最多，月底結算，大市好有機會回到呢個水平，大戶拉上補下，獲利亦算豐厚。若果真係落番9600，亦即係250日線（9580）水平，係好正常嘅技術性調整，後市仍可看好。
國企個勢真係好強，早段調整，但低位有承接力，午後大幅反彈，鋼鐵股最勁，大半貨源在大戶手中，任佢哋點舞。馬鋼（323）繼續做火車頭，低見1.19元後，幾下手勢已搶上1.27元高收，升5%，不過，國企調整幅度未夠，時間亦未夠，唔使咁快入市。
噚日超過1億元成交嘅股份，升幅最大係中國糧油（506），高收3.05元，大升10%，本欄上月曾作推介，話公司會有大動作，果然噚日就有引入美國同業成為策略性夥伴的消息，股價亦因而大升。中糧走勢一路做緊大型的複式頭肩底，噚日卒之突破頸線阻力，照度上去，可以見3.5元。
另一隻逆市而升而又值得留意嘅係太平洋恩利（1174），佢嘅大型頭肩底已做咗3個月，噚日就突破頸線（1.12元）阻力，且有近1300萬股的大成交配合，短期量度上升目標係1.45元。
恩利主要從事全球海產食品採購、加工及冷凍食品分銷，03年度（3月年結）業績快宣布，以中期賺4100萬元（升10.5%）而下半年會有較佳表現計，全年盈利可達9600萬元（升20%），每股盈利14.2仙，PE僅8倍。
集團目前正在青島建造加工中心，首期可在今年底完成，產量將增加75%，足以應付客戶的需求，令公司未來兩三年的盈利，仍可保持每年有20%的高增長。中國是恩利的最大市場，其次是北美同西歐，市場的轉變和行業的變化對恩利都有利。第一，內地人生活水平提升，對魚加工產品需求會逐步增加；第二，歐美地區廠房經濟效益低，規模已逐步萎縮，恩利正好取代他們的位置，特別係銷往歐美市場的屬高價產品，毛利率亦較高。
郭兆誠