年過六旬的譚先生，近日因肺癌惡化與世長辭，遺下妻子歐女士與就讀中五的女兒阿麗悲傷不已。「我成日勸老公唔好放棄，希望科學發達遲早有方法醫好肺癌，但結果佢都捱唔到落去！」遺孀歐女士歎道，更為無力辦理喪事終日憂心忡忡。蘋果日報慈善基金即時撥款，助歐女士支付亡夫殮葬費用，以解眼前燃眉之急。
四十八歲的歐女士淒然細說：「阿譚有哮喘病，氣管經常唔舒服。舊年佢成日咳得好犀利，冇幾耐就證實患肺癌，對佢打擊好大。」
譚家十八歲獨女阿麗幽幽地憶述：「上個月爸爸因為呼吸困難，要入院留醫個幾星期。出院嗰日佢心情好差，搞到搭錯車返唔到屋企，失蹤咗兩日。喺嗰兩日我同阿媽除咗等警方消息之外，重周圍去貼尋人街招，結果終於喺離屋企好遠嘅公園搵到爸爸。」
一臉愁容的阿麗說，那段日子她非常擔心父親的情況，又適逢要應付中五會考數學和英文科考試，令她承受莫大壓力，感到身心皆疲。她續稱，詎料父親日前肺癌惡化，未及度過今年父親節已撒手塵寰。
譚先生原籍台山，年輕時隻身由內地來港謀生，大半生從事街市大牌檔雜工，養活妻女；約五年前，因市道欠佳，譚先生被迫提早退休，自此靠微薄積蓄維持家計，生活儉樸。譚妻歐女士說：「呢幾年我曾經做過酒樓洗碗散工，幫補家計，但舊年開始一直冇工做，經濟真係好困難！」
如今丈夫病逝，歐女士要四出籌措殮葬費，感到彷徨無助，「𠵱家環境唔好，人人都手緊，坦白講呢幾日我只係籌到好少錢，都唔知點算！」
至於日後生計，歐女士說：「我有氣有力，當然希望去打工，靠自己賺錢生活。𠵱家最緊要先籌夠錢辦好阿譚嘅身後事，如果唔係我根本冇心情去搵工。」
蘋果日報慈善基金了解譚家的境況後，即時從「殮葬專戶」撥款二萬元，資助遺孀歐女士購置亡夫骨灰龕及墓碑等費用，紓緩其經濟壓力。讀者如欲介紹清潔或打雜工作給歐女士，可致電﹕29908688。捐款編號﹕C0995
為援助經濟緊絀家庭辦理殮葬事宜，蘋果日報慈善基金特設立「殮葬專戶」，減輕有需要人士在殮葬費方面的負擔，請讀者繼續捐款支持。 捐款編號：C0339
暖流熱線
電話:29908688
傳真:23702192
電郵:
網址：