教父搞搞震嚇街坊　代價大
秋生扮水怪　浸到皺皮

黃秋生再下一城拍攝的汽水最新廣告中，除了繼續扮演教父外，還要扮水怪在水中彈出，拍攝時動作要與拍檔Jimmy一致之餘，還要保持型男的扮相，光是這個鏡頭，秋生自言已NG了十多二十次，浸到皺皮。

黃秋生拍攝的「呍呢拿味可口可樂」廣告甚受歡迎，所以可口可樂再次找秋生擔綱演出新一輯電視廣告。今次秋生繼續做其教父，令他過足癮。

一齊彈上水
廣告中秋生除了教父形象外，更加是一位型男，但出名老戲骨的他，亦要NG多次才能完成，他說：「今次拍呢一輯廣告，絕對比上一次更加過癮，因為今次我唔使蹺埋雙手做大佬，而且可以玩濕身，扮水怪喺水入面彈出。」
秋生續說：「不過過癮背後都要付出代價，因為拍呢個鏡頭難度好高，導演要求我同拍檔Jimmy上水時步伐一致、動作一樣之外，重要保持住一個型男嘅扮相，睇就好睇，但淨係拍呢個鏡頭，已經NG咗十幾二十次，浸喺水入面咁耐，真係浸到皺皮。」

惹笑又幽默
而可口可樂中國有限公司巿場總監蘇薇接受訪問時說：「今次再次由黃秋生擔當演出全新一輯的廣告片，公司認為非常適合，黃秋生嘅演出唔單只符合公司今年活動『吓吓過癮』嘅主題，而且佢做得到幽默同惹笑嘅要求，尤其拍水中嘅一幕，一定會畀到觀眾極度過癮嘅感覺。」
黃秋生在廣告中除了拍檔Jimmy之外，並和一位女模特兒，以及趙頌茹的師弟李逸朗合作。