早排打開口牌，講明想集資嘅東強電子（615），上周急升後，守在0.70元樓上徘徊，噚日突然急跌10%，收0.66元，好彩成交唔算十分大，約1000萬元左右。經紀黃話，因為金手指基金在高位減持，打擊市場信心所致。
東強上周在短短幾日內急升4成，最高見過0.76元，正當大家以為芬佬尚未買齊貨，金手指失驚無神申報在0.70元水平減持2球貨，令持股量低於5%。消息一出，東強股價當堂靜晒，而金手指去向惹人關注，因日後佢再減持東強，唔需要申報。
由於東強尚未完成集資計劃，唔知呢件事會否帶來影響？
另外，再有人將好消息當壞消息炒，華豐環保（364）噚日公布截至3月底中期業績，盈利增加8%，有4538.3萬元，兼派中期息1.5仙，但股價仍然大跌9.59%，收0.66元。
經紀陳話，最近市場唱好嘅百靈達（2326），將於周五公布全年業績，慎防華豐同類事件會重演。
慕容小初