好多藝人都鍾意夜晚去蒲，紓緩吓壓力。噚日凌晨馮仁昭就撞到舒淇、徐濠縈、梁漢文同佢個模特兒女友Karen蒲吧。舒淇應該係同自己啲朋友去玩，不過佢哋成班人咁啱去埋同一間酒吧，所以一先一後離開。
噚日凌晨點幾鐘，馮仁昭見到舒淇同一個女性朋友喺跑馬地一間酒吧出嚟，見舒淇戴住頂帽，着住條吊帶裙，外披紅色外套，下身就着條牛仔褲。舒淇重攞住個近期大熱嘅LV同村上隆crossover嘅eyelove系列手袋。呢個手袋係OL近期嘅dream bag，價值一萬七千六百蚊，不過有錢都未必買得到，因為𠵱家香港已經斷晒貨。
而徐濠縈、梁漢文同女友Karen就早舒淇少少離開，佢哋徒步離開跑馬地，徐濠縈同Karen都冇化妝，所以見到有記者影相，都唔多自然。
佘詩曼同楊思琦噚日喺中環拍無綫劇集《無名天使3D》，通常女主角多就容易傳不和，不過今次兩個靚女都幾和平，重好有默契咁去對稿，大家有講有笑，睇嚟女仔多都唔一定有拗撬啫！問到思琦同阿佘、郭羨妮合作驚唔驚，佢話：「唔驚！我可以同阿佘、郭羨妮合作都已經好開心。」
張栢芝前晚喺尖沙嘴警署拍新片《大隻佬和尚》，佢細佬張栢文遲啲加盟中國星，所以都有嚟學嘢。對於環球唱片負責人陳少寶不滿栢芝冇時間錄音，噚日栢芝經理人李小姐話栢芝完成工作後，定必抽時間出唱片。另外，佢又否認有傳栢芝同王菲爭買鞋，因為佢哋冇碰到面咁話。
據韓國報章《漢城體育》報道，貴為國際級藝人嘅內地女星章子怡，有機會喺人氣電影《我老婆係大佬》續集嘅最後一幕出現。《我》片重計劃拍第三集，到時章子怡嘅戲份就會增加，有成半部戲咁多。如果呢個消息屬實嘅話，章子怡將會繼《武士》之後第二次演出韓片。
尹志強噚日出席亞視生日會，問佢同米雪一齊入表申請做馬主有結果未？尹志強話：「成功咗啦！我哋預算用一百萬買隻馬返嚟，重諗住改馬名叫雌雄大盜，加埋同米雪呢隻我已經有三隻馬，今年曾志偉又抽唔到做馬主，我同佢講話出年我同佢夾份申請，因為我腳頭好。」
