數碼影音：
三星MP3夏日五機潮人必選扭擰電芯王

炎炎夏日實屬戶外活動好日子，隨身帶住MP3機一邊逛街一邊聽歌，夠晒賞心樂事。三星睇準暑假檔期，喺噚日嘅發布會一口氣宣布推出五部新型號MP3機，以超靚仔賣相及強勁功能搶攻市場。當中以一款酷似電芯嘅YP-55H最具創意，扭吓擰吓就揀到歌，相信可吸引到一班潮男潮女追捧。

記者、攝影：徐影龍
ImageGirl：Patsy

五部新機中有三款為新系列機種，另兩部為舊型號升級版。出乎意料地，今次五部新機都走較Cyber斯文路線，過往Yepp大玩嘅五顏六色機身、扁圓形同腰果形設計統統唔見，彷彿意味住Yepp開始偏向成熟嘅一面。

YP-55HProfile：
體積：26×81×26mm
重量：45g

阿公阿婆都識用
機能方面絕非省油的燈，有齊市面最Update功能，如FM電台接收、現場錄音、藍光屏幕等，最正係設有MP3Encode晶片，可直駁各式音響裝置如Hi-Fi、Discman等，即場錄製成MP3檔案儲存，完全不經電腦，公公婆婆都識用。另外除9段EQ調校外，重有三星獨門SRSWOW技術，令歌曲增添環迴效果。YP-55H頗為慳電，一粒3A電已可連續播放15小時，長途旅行聽足一日都唔使換電。

揀歌左扭右擰
YP-55H屬五部新機中嘅重頭戲，外形設計完全打破舊有框框，四方柱體配搭銀、藍兩色，加上金屬機身嘅質感，Cyber型仔度絕對攞滿分。外貌似電芯多過似MP3機嘅YP-55H，另一搞鬼地方係機頂嘅扭擰操作，輕輕向左或右擰，就可作前後搜曲之用，雖然方便程度唔覺有乜提高，不過人前示範肯定潮到爆。

變身電話錄音機
嚴格嚟講呢兩款Yepp屬另一系列產品，以VoiceYepp為名可見其重點放於錄音功能方面。雖然兩款機外形設計有頗大差異，不過功能差不多，兩者最大特色係電話錄音功能。透過附件接駁家居電話後，便可即時進行錄音，最啱記低商務會議內容，又或打電話問功課之用。另一特色係機身內置擴音晶片及喇叭，唔插耳筒都可即時聽歌或翻聽錄音內容，錄音訊息最高可分為495段，搵起上嚟方便得多。黑金剛VY-H200S體積較長及大，屏幕可顯示藍、綠及橙三色，賣相型仔可惜容量最高只有64MB，錄得1,630分鐘。另一款VY-H350H賣相較普通，不過最高有128MB記憶體，足足可錄3,270分鐘聲音，煲幾個鐘頭電話都夠氣錄得晒。

VY-H200S?VY-H350HProfile：
體積：36×113×18.5mm?34×92×18mm
重量：71g?69g

機仔細細功能豐富
驟眼睇呢部YP-35H跟舊型號YP-30SH頗為相似，不過取消咗如PalmTT嘅下拉式設計，機身體積變得更纖薄小巧，29.5g為五款機中最輕一部。全金屬機身細得嚟好有質感，擺脫同類機塑膠玩具Feel。機能方面應有盡有，如現場錄音、9段EQ調校、發光屏幕及SRSWOW環繞音效等，最正係咁細部機居然有埋MP3Encoding壓縮編碼功能，可直駁Discman錄製MP3，完全毋須電腦介入，而且編碼速度令人滿意。

YP-35HProfile：
體積：44×66.5×16mm
重量：29.5g

升級新加七色屏幕
另一部同屬升級版嘅YP-750，由外形到機能都跟舊型號YP-700大同小異，不過就加入七色屏幕顯示，隨住使用狀態會有唔同顏色顯示，如一般播放為綠燈、提高音量時變成紅燈等。雖然冇乜實際功能加入，不過本身幾項獨門機能仍然吸引，如兩倍壓縮MP3、20小時特長播放及支援SmartMedia記憶卡等，賣價變動亦頗大，舊型號YP-700內置64MB索價$1,780，新機價錢一樣記憶容量跳升兩倍，相當之抵玩。

YP-750Proflie：
體積：54×87×14mm
重量：67g

SAMSUNG查詢：28626008