離開Morning娘之後愈嚟愈獨當一面嘅後藤真希，少少cool嘅形象始終係松浦亞彌同藤本美貴之外，另類偶像少女選擇。我羅拉收到料，佢三月尾推出嗰本個人寫真集《maki》好賣到不得了，呢啲就係人氣急升嘅證明。佢間公司諗住可以賺多筆，就連新嘅寫真集都唔拍，即刻喺《maki》裏面重新揀選過啲相，火速推出咗本超豪華嘅《moremaki》。
講真，喺我羅拉嘅寫真集收藏嚟講，呢本都算最巨型，淨係個盒都有成十五吋長，兩吋厚。咁各位又唔好以為咁厚本寫真集就有成幾百張相咁多，只係個盒入面又有海報、又有貼紙同3R相啫！咁啲相其實同上次本寫真係好類似㗎，不過角度好似性感咗少少，難怪fans一樣乖乖哋作出「奉獻」。
不過，我羅拉收到風，話最近後藤真希又唔聽話，同堂本剛搭上。佢兩個之前一齊去浸超高級溫泉，又嘈又囂張，結果通晒天，俾雜誌寫咗出嚟。事務所知道之後好嬲，而後藤班fans、即係米飯班主重嬲。唔好唔信邪，上次後藤同山下智久滑雪後，就傳出山下俾後藤fans襲擊呀，都咪話唔驚。
講開堂本剛，據噚日出版嘅日本報章《NaitaiSports》報道，佢早前喺KinkiKids嘅演唱會，因呼吸病緊張到連歌都唱唔到，所以被人話佢有上台恐懼症。