自從沙士一疫，減價開倉多到迫埋身，感覺都好似有點麻木。在麻木的心情下，今次的開倉減價算是新衝擊，皆因場內件件都係年輕男女的心水名牌，價錢超抵、款式超靚外，最緊要尺寸超齊，想用$300的價錢執晒全身，或者買最流行的波鞋都得，相信今次實滿足各位運動用品愛好者。
記者：區佩嫦
攝影：陳智良
Model：Ryan、Tammy、Sue(SunSpot)
帶點板味的橙紅色恤衫，夠晒colorful，前面睇看似平平無奇，一望後面就見到最特別的繡花LOGO，成個logo加了翅膀，十足速遞公司的招牌咁，加上勁sharp的黃色，份外醒神。
原價：$329
開倉價：$60(A)
近日時晴時雨，着跣水褲就最好，這條杏色的puma跣水褲夠晒輕身，褲側又有拉鏈位，透氣效果不錯，炎夏穿着都唔覺得焗。
原價：$299
開倉價：$60(A)
勁似adidasSuperStar的ReebokIMPULSE別注版，最特別是鞋頭印有美國國旗，加上款式夠Classic，極具收藏價值。
原價：$499
開倉價：$150(A)
以半價發售的ReebokTee，絕對抵着，白色的純棉質地夠晒吸汗，平日出街或者做運動時穿着就最perfect，同場還有其他圖案，不妨慢慢揀。
原價：$129
開倉價：$64.5(A)
同樣屬於PUMA的運動褲，不過這條以四個骨兼束腳設計，款式夠晒特別，可調校褲腳的長短，要泡泡腳或者直腳亦可，悉隨尊便。
原價：$259
開倉價：$80(A)
講舒服Diesel的便服鞋是不錯的選擇。好似這對便服鞋，鞋頭方形設計，着上腳較一般波鞋舒服。沉色鞋身，勝在襟污糟又易襯衫。
原價：$590
開倉價：$250(A)
顏色sharp是Diesel的一貫作風，這對蘋果綠色的運動鞋，顏色sharp到暈，鞋面以絨皮混尼龍質料，加上魔術貼設計，穿着方便，設計又醒目，最能迎合夏天繽紛的色彩。
原價：$430
開倉價：$250(A)
以質取勝的DKNY，鞋款一向平實中見心思，好似這對杏色的便服鞋，鞋帶位上配了杏橙色的鞋脷冚，完全遮蓋鞋帶部份，果然別出心裁，再加上DKNY這個名牌牌子，𠵱家平了足足$600，實屬場內必搶之選。除了男裝的杏色外，還有屬於女裝的銀色。
原價：$890
開倉價：$290(A)
除了便服鞋，場內亦有不少拖鞋款選擇，這對FreeByGottex的女裝沙灘拖，我最喜歡鞋面印上略帶野性的豹紋圖案，襯牛仔褲、短褲甚至三點式都咁好睇，𠵱家$30一對，重使諗？梗係第一時間搶啦！
原價：$99
開倉價：$30(A)
鍾意PUMA的人都愛其OldSchool的感覺，這對PUMA的TRIMM-FIT波鞋，放棄一般的綁鞋帶設計，改為魔術貼，是芸芸PUMA波鞋中最具特色的一對，加上紅搭白的顏色又夠豔，襯直腳牛仔褲最靚。
原價：$549
開倉價：$190(A)
PUMA的復刻鞋亦是當中的煞食之選，這對深藍色的復刻鞋，款式夠晒Basic，顏色夠大路，屬於長興款式，今次$190就有一對，的確抵着，不妨買定幾對喺屋企睇門口。
原價：$439
開倉價：$190(A)
除了超筍的開倉外，還有不少超Hit的波鞋做緊減價，想買Nike、adidas的朋友，一定要留意，保證有對合你心水。
講到lady，我必定揀呢對WaffleRacer，鞋款以藍白為主色，最正莫如鞋身的同色繡花，加埋彩藍色的「剔」，最啱斯斯文文的女仔着。
原價：$649
特價：$399(C)
adidas的功夫鞋真係長出長興，顏色可謂日日新款，嫌一般黑白色功夫鞋太普通，呢對鴨屎啡，配上鮮橙的三間，夠晒特別，着時襯番條短褲或三個骨褲就最fit。
原價：$699
特價：$499(B)
講到抵着，呢對adidas復刻版的LaTrainer就真係超抵。呢對鞋款式夠晒classic，除了閃令令的三間夠特別外，鞋底部份的三粒鈕拆去後更可變成對air波鞋，着去跑步就更加舒服。
原價：$499
特價：$199(C)
除了Nike和adidas外，NewBalance亦有不少支持者，這對NB574波鞋屬於大熱classic款，咁多款式中，我最鍾意這對藍襯桃紅，充滿超強勁的OldSchoolFeel，𠵱家只係$240，連唔係fans的我都心郁郁。
原價：$450
特價：$240(C)
以潮流鞋為主的公雞，近期可謂推乜紅乜，當中以波砵最受歡迎，無論乜質料都咁hit，好似呢對以尼龍為質料的波砵，喺黑、白、杏色之中，我最鍾意都係這對粉藍色，夠姣又易襯衫。
原價：$499
特價：$320(C)
女士可能對波鞋無乜興趣，場內亦有不少配件以供選擇，好似呢個OldSchool味勁重的手挽袋，夠晒可愛，放銀包、化妝袋等剛剛好，最啱平日去街街用。
原價：$199
開倉價：$80(A)
陽光海灘是夏天的最佳娛樂，同場有不少特價泳衣泳褲任你揀，好似這條Speedo男裝泳褲，保守的孖煙囱款式，加上簡單的線條圖案，簡單又襟睇，啱晒保守型男士。
原價：$259
開倉價：$59(A)
有泳褲點少得泳衣？這條arena泳衣雖然屬中童size，不過尺寸夠晒大，嬌小身形的女士亦啱着，而我最欣賞便是泳衣上的漸變形，未着上身已恍如置身碧海中蕩漾般，感覺極享受。
原價：$289
開倉價：$69(A)
家長最怕小朋友玩水時被太陽伯伯曬傷，不妨選擇這件arena小童落水衣，具防紫外線功能，小朋友着住玩水都唔怕曬親嬌嫩的皮膚，𠵱家只係$69，重唔行快步！
原價：$129
開倉價：$69(A)
資料
(A)太古運動用品
地址：銅鑼灣軒尼詩道祟光百貨21樓祟光宴會廳
查詢電話：23106288
開倉日期：6月20至22日、27至29日
(B)MVP
地址：旺角花園街55至57號地下
查詢電話：23847381
減價日期：今日起至6月26日
(C)SportGallery(Express)
地址：旺角信和中心G8號舖
查詢電話：23328085
減價日期：今日起至6月26日