移民顧問C早年在美國留學，得法律學位，對美國移民法例極有認識，八七年回港，可說食正八九民運、九十年代九七移民呢兩個大浪，收入非常豐厚，因此可以送三個女到美國讀寄宿學校及大學，以每位每年三至四萬美元計，真係「如非有咁大個頭，點敢戴咁大頂帽」，每年賺少啲，都會斷擔挑。
顧問C為人細心，為女兒選學校，絕不崇尚名氣，最怕吹牛。顧問C話：「呢幾年為三個女選校，出席過不少甚麼教育展覽會，名校開放日，名校校長嘅香港招待會。有好多美國學校的校長生成勢利眼，試過一次出席招待會，招待會上冠蓋雲集，我等足四十分鐘，仍未可以與校長握手，因為校長忙於握住F公子隻手，跟住與地產大亨L公子、K公子交談，總之周圍轉都冇我份，自己惟有自動走上去握佢隻手，自我介紹，見佢反應冷淡，梗係唔敢送個女入學啦。後來我哋見到一間好樸素，好誠懇嘅校長，與女兒親自去學校睇過，佢又鍾意學校環境，於是放棄銅鑼灣鬧市地段嬌嬌女生活，投身加州郊外森林。嗱，講出嚟，好多香港家長頂唔順㗎，全校二百幾位學生，二十個先生，每年三萬幾美元費用，得到乜嘢呢？無論風雨學生朝朝五點幾起身，到馬房做馬伕，掃馬屎，為隻馬潔淨，然後拖隻馬出嚟做晨操滿山跑，最初日日驚到喊，𠵱家就好鍾意，成個女騎師咁款，兼且體魄強壯無畏無懼！」
呢日見到C千金，文質彬彬，好有禮貌，估唔到如此堅強也！