美股升勢放緩，港股10000點大關失守，雖則話熱錢流入，但人心始終虛怯，唔少人見好即收。
市場傳出，小小超可能將電盈（008）之大股東盈科拓展私有化，消息刺激電盈股價甫開市急升逾5%，但其後盈拓否認，電盈股價倒跌3.74%收市，收5.15元，成交高達9.67億元，其中有唔少沽盤來自早前幫大東配售電盈嘅花旗美邦，唔通有人想借消息出貨？
不過，呢單傳聞可能係空穴來風，未必無因，因為盈拓有私有化誘因，盈拓市值僅35億元，但單係佢手上32.7%電盈股權，市值已達78.6億元（電盈現價仍處低谷，且大東已盡沽電盈），現時買盈拓抵買過電盈好多，小小超若此時將盈拓私有化，絕對有着數。盈拓已不當電盈為附屬公司，私有化計劃未必會涉及對電盈全購，所以追捧電盈亦唔一定有着數。
另外，市場又傳出中國通信廣播衛星集團擬將亞太衛星（1045）私有化，刺激股價急升43.42%，收報2.725元，成交達2866萬元。醒目股民更跟手炒埋亞洲衛星（1135），升5%，收13.40元。
利豐雅高（623）獲新加坡科技旗下印刷出版集團入股，兼提出全購，但收購價1.42元，低於前收市價1.57元頗多，所以不但冇人跟進炒作，而且沽壓頗大，結果收報1.46元，跌7%。呢個現象反映散戶認錢唔認人。
馬鋼（323）又升5％，成交1.56億元，今次唔係傳中資買貨，而係傳摩根大通旗下基金增持，但阿虎記得呢個基金已買咗唔少中資股，莫非重未夠喉。
阿虎