曾經掀起鑲鑽石膠表熱潮，勁多明星撐嘅TechnoMarine，表價一向企硬，絕少減價；但由今日開始連續三日，無論賣過萬蚊嘅鑲鑽款式或者千幾蚊嘅彩色透明帶膠表都會以筍價發售，最平減到四折，最貴嗰隻款平咗接近四萬蚊，勁誇張！
記者：馬慶武 攝影：梁細權
Model：Angel(Sunspot)
減價日期及時間：今日起至6月20日(上午11時至下午8時)
地址：銅鑼灣時代廣場國民西敏大廈27褸2707-2711室
電話：21186050
必搶款式
最出名最多年輕人追捧嘅款式，離遠見到都知係TechnoMarine，價錢較經濟之餘，亦有多種不同搶眼顏色供選擇。今次由過千蚊減到六百幾蚊，實在係史無前例新低價，不過亦因為受歡迎又減得抵，所以貨量唔多，定必成為搶手貨。
就係呢一隻鑲石表圈配上透明膠帶款式，帶起TechnoMarine熱潮，勁多本地明星都手戴一隻以示支持。
呢隻款同樣受到各界人士追捧，今次重平咗成半。潛水表三圈設計，但表圈及表面都鑲滿鑽石，再配上粉紅皮帶，Sporty得嚟又有貴氣。
型格之選
齋睇沉實嘅金屬表身，無乜TechnoMarine手表嘅玩味感覺，不過配上鮮黃色搶眼表帶，年輕感覺即刻返晒嚟。
表身較細小嘅潛水表款，的骰精緻最啱女仔戴。
全場減最多
之前介紹嘅鑲石TechnoMarine都係以型格行先，講貴氣講身價就唔及呢隻喇，表身、表面都鑲滿鑽石，加埋「S」形造型，充滿女人味。雖然係最貴嘅一款，但平咗接近4萬蚊！
除咗TechnoMarine手表外，同場減價嘅重有英國首飾名牌EricksonBeamon、Tateoasstan、意大利MaliParmi嘅頸鏈、手鏈同耳環，減到四折平咗大半，買埋嚟襯TechnoMarine型表就啱晒數喇。