兩年前，高盛證券丁大姐曾引述在新世界（017）管理層引導下，撰寫報告時將新世界盈利預測大幅調低，引起軒然大波，當時純官大動肝火，強調沒有高層向高盛披露資料，一時間誰是誰非糾纏不清。兩年後，證監以丁大姐選擇性披露資料對公眾不公平，對她作出公開譴責。事件令行內為之嘩然，其一係證監要兩年後才採取行動，效率之慢實在得人驚；其二係如果丁大姐要負責，咁披露資料的源頭又使唔使負責呢？
港股噚日借美股強勢及中港將簽訂更緊密經貿關係而大升，恒指突破10000大關，不過升至此水平後，港股隨時無以為繼，除非大市成交進一步增加，否則後市有排牛皮。恒指收報10030，升168點，成交逾百億元。
建美（851）噚日下午遭斬倉，股價急挫90%，收報1.8仙，成交高達2256萬元。據聞主要原因係公司上次以每股17仙批6000萬股出街，承配人接貨後股價一直無表現，加上成交稀疏甩唔到手，最終被證券行斬孖展倉。此股下午一路急挫，跌咗88%至2仙後才有買盤入市接貨，但股價要跌至1.5仙方能止瀉，入市者估計大多數係想執死雞的散戶。黑客話，通常股份遭斬倉，股價都會出現技術性反彈，不過何處是底就真係唔易估。
建美插水亦拖累上海銘源（233）大跌68.7%，收報5.6仙，成交亦有282萬元。據聞，建美的炒家亦有玩開銘源。Cookie話，自周正毅事件發生後，證券行對莊家股更加小心，股仔插水情況可能陸續有來。
阿虎