陳文媛（BoBo）是家中獨女，從小在嚴厲的家法下長大，然而，小BoBo逢周末和周日均會見到十分疼錫她的外婆，每當她想買玩具，或因做錯事而被父親懲罰時，BoBo便會找外婆出頭，所有問題便會迎刃而解。
陳文媛是家中獨女、父母的掌上明珠，但她卻不曾試過恃寵而生驕，因為從小她的父母便管教甚嚴，每當BoBo做錯了事，她的父母便會即時「家法侍候」，絕不手軟。
BoBo說：「我細個嗰陣，爹哋媽咪好惡，唔會隨便買玩具畀我玩，平時返學放學，屋企人又會接我，怕我學壞喎！其實我細細個已經好乖，爹哋一話唔准，我已經唔敢做！」
雖然父母甚至跟她同住的祖母都對BoBo管教甚嚴，但每到周末和周日，BoBo便可以放縱一下，BoBo說：「每逢周六同周日，媽咪就會帶我去婆婆屋企玩，因為婆婆唔係成日有機會見到我，而我當時又係佢唯一嘅孫，所以婆婆特別疼錫我，我知道爹哋媽咪唔肯買玩具畀我，我就等到星期六叫婆婆買。有時爹哋見我做錯事想打我，婆婆就會幫我擋，真係錫到我燶！」
BoBo的外婆知道乖孫喜歡吃雞翼，便每次也弄不同款式的雞翼給BoBo品嘗，包括芝麻雞翼、鹵水雞翼、薯仔燜雞翼和炸雞翼等，有外婆這個「大靠山」，難怪BoBo每星期也嚷着要到外婆家中過夜！
BoBo說：「𠵱家大個咗出嚟社會做嘢，同婆婆唔係成日見面，就算爹哋媽咪都唔係成日可以見到。不過每逢過時過節，我哋都會食飯見面。另外，婆婆喺我細個嗰陣成日買嘢畀我，我𠵱家賺到錢，都有送吓手袋同化妝品孝敬婆婆㗎！」
採訪：戴彩煥
