情路坎坷女星又真係幾值得人同情，不過以後佢真係要帶眼識人。
幾個月前已經有人勸佢唔好太信佢嘅情場騙子男友，話佢個男友唔多老實，專搵女人錢，點知佢唔聽，重反駁朋友，話今次自己有帶眼識人，唔會再錯。啲朋友勸唔掂佢，當然搖頭歎息。
情場騙子以前都係大滾友，專滾女人錢，而且最鍾意冧啲中年女人買樓畀佢，到有樓到手之後，佢就會離開個女人，嗰啲女人多數係有老公嘅，所以就算蝕底咗都唔敢講出嚟。
當時佢識坎坷女星都以為有得執，話晒之前女星都跟過有錢嘅圈中人，點知後尾發覺佢冇乜錢，條友梗係繼續出去搵食啦！
江欣慈噚日好狼狽咁着住對爛人字拖去港台做訪問，佢話自己第一次咁尷尬，喺街度爛鞋，之後，佢重俾主持人陳淑蘭問佢同外國男友分隔兩地，點樣發洩自己嘅需要，馮仁昭諗阿慈聽到呢個問題比佢爛拖鞋重尷尬，佢好無奈咁話：「作曲囉！」吓，作曲都可以滿足自己？
劉德華日前接受新城娛樂台節目訪問，主持之一嘅黎小田向華仔道歉，原來佢當年作嘅歌曲《為您鍾情》最先係為華仔度身訂做，不過因為佢當時同無綫嘅合約問題，所以無緣唱呢隻歌，結果就畀咗張國榮唱。華仔話原本諗住喺嚟緊嘅演唱會，以大戲造型唱HipHop，不過𠵱家因沙士而取消個唱，所以fans要再等吓喇！
黎瑞恩大肚之後，肥咗好多，俾一班朋友笑佢做「豬恩」。呢班朋友真係玩嘢，不過小恩子聽到都冇唔開心，因為佢知道𠵱家自己係大肚兼大晒，日前佢幫商台做咗一個錄音訪問，佢就好自豪咁話：「𠵱家我奉旨食奉旨肥，乜都得，我都係肥咗四十磅，已經比我想像中瘦。」
錢嘉樂同台灣組合F4成員吳建豪，前晚喺新蒲崗嘅拳館練拳，吳建豪班歌迷重等咗偶像幾粒鐘，歌迷見到吳建豪嘅助手，以為好快會見到偶像，佢哋重一字排開想夾道歡迎吳建豪，點之等唔到吳建豪，反而等到教佢拳嘅錢嘉樂。唔知吳建豪嘅歌迷係咪等得耐得滯，連嘉樂仔都唔放過，猛咁同佢握手。
蔡慧敏九八年為飛利浦做代言人，拍咗輯平面同電視廣告，有十一萬五千蚊酬勞，後來對方取消播電視廣告，喺○一年向佢討回酬金。蔡慧敏早前反告對方，噚日佢喺灣仔接受訪問話：「係佢哋個廣告唔出街，加上冇聯絡過我，𠵱家我反告佢哋，要佢哋賠五萬蚊就真。佢哋有同我傾想庭外和解，但係條件就唔啱，我唔甘心俾人屈。」呢件案喺下月二十四日再審。
案件編號：SCTC033441/03
