恒指升破10000大關，收市大升168點。不過，同芬佬傾開，佢哋話要確定港股牛市重臨，第一要睇今次升後調整嘅深度，能否守得穩在250日線（9584）水平，第二要睇下個升浪，能否衝破前高位10247而定。芬佬已確認美股同歐股開展牛市升浪，港股唔會偏離大隊啩！
國企繼續調整，個別幅度都幾大，升得急，自然回得多，正常消化而矣，估計今次整固會維持多幾日，下禮拜又可以擇肥而噬。散戶仍未「心雄」，後市重有排玩。
大行同基金除買住大藍籌外，對好多二三線股亦情有獨鍾，噚日收到料，話大行睇好隻亞洲鋁業（930），重調高目標價至1.25元；噚日亞鋁收0.96元，升2仙，預期升幅有30%。
基金選股，其中一個主要條件，係公司在行業中要具有領導地位。亞鋁就啱晒條件，旗下有5間廠房，年產鋁型材12萬公噸，已係亞洲之冠，集團並計劃投資10億元，併購內地鋁廠、興建新廠同提升產能，令每年產量可上升43%，到04年底年產量達20萬公噸。亞鋁「晒士」繼續膨脹，大者愈大，更得基金鍾意。
非典影響已告一段落，中國經濟預期仍可保持高增長，基建項目對鋁材料需求龐大，目前手頭定單有22億元，生產設備使用率近100%。截至02年12月的半年，營業額11億元，升17.4%，盈利1.77億元，大增83.7%，包括出售附屬公司的特殊收益5240萬元。全年度盈利料不會少過3億元，每股盈利12仙，派息5仙，預測PE8倍，息率5.2厘。
大行報告指亞鋁未來幾年的盈利可保持高增長，03年度增長逾倍已在預期之內，而04至06年度，仍可保持高雙位數的增長，特別係06年度，在盈利已大增的基數上，仍會有66%的升幅。集團現時手頭有淨現金7.5億元，加上每年業務有2億元淨現金流入，足夠應付未來發展之用。
由去年5月開始，亞鋁周線圖形成大型V底，頂部阻力0.92元，已破位而上，短線目標指向1.1元，中線可見1.3元。
郭兆誠