一味窩輪:長實輪9764追得過

一味窩輪:長實輪9764追得過

個市欲罷不能,恒指升破一萬點,電訊股做龍頭,地產股亦唔曳。市場資金似乎流往落後藍籌。
長實(001)一級級上,收50.50元,升50仙。喺地產股中,是日升幅細過晒新世界發展(017)、恒地(012)同新地(016),有機會追上去,啲Call輪追得過。
長實Call輪好易揀,對象就係9764同9829一對。9764今年9月到期,現價41仙,溢價5.1%,槓桿率12.3倍,溢價合理,槓桿率則好爆,成16球易手,唔怕買賣難。9829今年11月到期,現價76仙,溢價4.2%,槓桿率6.6倍,比較適合穩健炒家埋手,若係搏殺格,自然應該揀9764。
電訊股繼續由聯通(762)導航,收5.75元,再升6.5%,兩日夾埋急升12%。8號仔電盈似乎知恥近乎勇,月初大東批股以來是日最威,高收5.35元,有30仙進帳,成交量由41球大增至90球,其他電訊股成交量增幅冇隻夠佢勁。

電盈勁Call輪可吼
電盈先一排30億元披成嗰批貨,應該已經消化得乾乾淨淨,芬佬再度埋位,唔怕好似以前咁成日驚住大東批貨等住沽售,少咗不明朗因素,踢起上嚟寧舍爽手。電盈以往慣性走勢,係除非唔郁,一郁就有番咁上下幅度。炒電盈Call輪,真正又係得兩隻揀,就係9762同9662,後者屬搏殺格,刺激性好高。
章盛