職業女性要顧住份工又要顧住頭家,放工難免冇時間煮飯,出街食得多老公又會詐型。其實只要安排得妥當,在家中煮食都唔會花太多時間,𠵱家就等Joanne示範幾味又有益、又啱產後進補嘅菜式畀大家試試。
文:陳宣明
攝影:周旭文
示範:Joanne(牛池灣讀者)
產後的Joanne現在要返工,又要照顧三個月大的仔仔皓霆及老公Eric,十隻手指用晒都唔掂。Joanne沒有請工人幫手做家務,她喜歡一手一腳搞掂家中事情。之前SARS爆發,她擔心剛出生的皓霆,不敢帶他外出,細路可以唔出街,但大人都要食飯嘛!為了家人同自己嘅健康,幾忙都好,Joanne都會細心設計多款有益又有營養的菜式給老公吃,自己煮又唔怕太油膩,吃得Eric大快朵頤。
Eric話街外食的咖喱雞油多兼辣,佢就最怕食辣,但用咖喱煮的菜式又很惹味,所以Joanne得閒時就會煮咖喱雞給他吃,自己煮就容易控制咖喱粉的份量,咁就唔怕辣啦!雞全翼還事先出水去油,包保唔油膩。
用咩料:(二至四人)
雞全翼 4隻
薯仔 1個
洋葱 1個
咖喱粉 1匙(喜歡咖喱的可多放一點)
好易煮:
1.薯仔切小件、洋葱切片備用。
2.將雞全翼解凍後切件,加調味料醃約20分鐘後略煎。
3.薯仔煮至半熟,加入咖喱粉、雞全翼及3碗水,用中火燜10至15分鐘。
4.最後加入洋葱兜熟即可。
唔好以為用鮑魚煲湯就一定好貴,Joanne係名精打細算的現代煮婦,當然選些平靚正的鮑魚仔啦!一包有成八、九隻,分幾次煲都得。Joanne重話工作及照顧屋企咁辛苦,點都要慰勞吓自己。
用咩料:(二至四人)
急凍鮑魚仔 5-6隻
紅蘿蔔 2個
粟米 2條
豬𦟌 6-8両
蜜棗 3粒
南北杏 1両
好易煮:
1.鮑魚解凍後出水備用。紅蘿蔔、粟米切件。豬𦟌洗淨加鹽醃10至20分鐘。
2.用八至十碗水煲滾後,加入材料(除豬𦟌外),再煲1小時。
3.加入豬𦟌以慢火再煲2小時,然後加少許鹽調味。
Joanne最鍾意食菇,尤其係雞髀菇,雞髀菇用來BBQ也非常美味。Joanne以XO醬來炒椰菜,有口感又鮮味不減,對還在產後修身或減肥人士來說是最好的選擇。
用咩料:(二至四人)
椰菜 半個
雞髀菇 2條(中size)
鮮冬菇 4隻
蒜頭 2粒(切粒)
XO醬 少許
好易煮:
1.椰菜洗淨切絲,雞髀菇及鮮冬菇浸軟切薄片。