著名電影雜誌《Premiere》以性愛作為佢哋最新一期嘅主題，所以今次搞咗個電影史上十大至火辣性愛場面選舉。我羅拉睇過個名單，發現入面好多部都係影迷好熟悉嘅經典作品，而且大部份都係超過二十年嘅電影作品，近幾年入圍嘅作品，就只得兩部咁大把。
個名單似乎證明咗大家仍然非常懷念一啲經典舊作，今次有幸俾《Premiere》選為至火辣性愛場面嘅電影，就係意大利名導安東尼奧尼（MichelangeloAntonioni）喺六六年嘅作品《春光乍洩》，而第二同第三位嘅電影年代就更久遠，分別係性感女神瑪麗蓮夢露（MarilynMonroe）嘅五九年作品《熱情如火》，以及性感小野貓碧姬芭鐸（BrigitteBardot）有裸露演出嘅《...AndGodCreatedWoman》。
大導演貝托魯奇（BernardoBertolucci）嘅爭議作品《巴黎最後探戈》亦排第五位，入面馬龍白蘭度（MarlonBrando）搽牛油打真軍場面，唔少影迷應該重記得。而兩部○一年作品《MulhollandDrive》同西班牙電影《露茜亞的情人》就分列第九同第十位。