家陣市道唔好，一間球會肯出五百萬鎊（約六千五百萬港元）買一個球員，算係出手闊綽；但係，阿仙奴肯出呢個價，都買唔到AC米蘭嘅意大利門將艾比亞迪，咁騎呢問你服未！
日前有報道話阿仙奴出價五百萬鎊買AC嘅後備龍門艾比亞迪，而消息亦已得到AC方面證賽；不過，AC經已發表聲明，話佢哋同艾比亞迪都唔打算同阿仙奴做呢單交易。我求大俠聽到之後，真係覺得AC好儍；當然，艾比亞迪願唔願意去又係另外一回事，但係大嗱嗱五百萬鎊AC都唔要，唔通佢哋贏咗歐冠盃後嫌錢腥？從另一個角度嚟睇，我求大俠亦覺得阿仙奴好笨，今日咁嘅市道，佢哋使唔使用五百萬鎊買人家件後備龍門呀？
英國有個網站，喺報道馬體會嘅艾美遜會過檔米杜士堡時，竟然落錯咗羅馬艾馬臣嘅相；正所謂忙中有錯，呢個網站搞錯咗，其實冇乜大不了；但係，艾美遜之前喺踢過米杜士堡一段時間，兼且外形同樣貌同艾馬臣有好大分別，所以英國佬今次將佢哋兩個搞錯，真係要打PatPat。
馬拉當拿喺八六世界盃向英格蘭使出上帝之手，搞到英軍喺八強出局，而阿根廷最後重攞埋冠軍㖭；所以近期馬拉當拿俾佢哋選為最冇體育精神運動員，係可以理解嘅，英國佬花咁多精神同時間去憎馬拉當拿，不如諗辦法改善英格蘭在國際賽嘅成績好過啦！
南韓喺去年世界盃勇奪殿軍，成隊波成為國家英雄，好似宋宗國咁，佢日前同大學生女朋友拉埋天窗，但係就唔使花一分一毫，事關有間大機構贊助。聽講宋宗國重約埋亦係啱啱新婚嘅李榮杓同薛琦鉉夫婦一齊去濟州度蜜月，以佢哋𠵱家嘅名氣，分分鐘住宿都有酒店包埋！
愛華頓門將李察胡禮日前喺屋企個閣樓跌咗落嚟，整親個膊頭，要休息六至八個禮拜，搞到來季季初可能缺陣㖭。李察胡禮今次做咗最佳反面教材，因為一次意外、足以致命，相反愛華頓領隊慕耶斯今夏認真充實，暑假期間佢幫報紙寫專欄，放假都喺度搵銀。