官場「鑽石王老五」、衞生福利及食物局局長楊永強，呢兩日到大馬參加世衞會議，局長喺大馬怡保出世，返到老家可以同家人見面，心情靚靚，所以成日笑唔停口。噚日佢請一班記者食晏時，多位女記者要求合照，佢來者不拒，十足明星咁。
楊永強話自己廣東話同中文都唔係幾好，因為細個同阿爺講福建話，同父母講英文，同朋友就講馬拉話，搞到樣樣都半桶水，而佢最鍾意嘅家鄉食品竟然係榴槤；楊局長好有心得咁話，食得多會肥而且熱氣，而泰國榴槤雖然夠大個，但唔及馬拉嘅咁香。
雖則局長滔滔不絕講童年往事，但對感情生活就絕口不提，只係講到當年喺伊利沙白醫院做高級醫生時，日日返工等放工，「買部胃鏡已經好大工程」，悶足佢兩年，之後佢打低六名比佢資深嘅高級醫生，爆冷升做顧問醫生，當年佢只係三十三歲，係最年輕嘅顧問醫生，轉去瑪麗醫院主管內科部，由於當時唔係好多專科醫生，佢一腳踢乜科都要識，惟有自己進修，「成世人都未讀過咁多書」，唔知係咪因為咁，令佢錯過姻緣呢？
（圖）成班女記者圍住楊永強影相，局長風頭直迫大明星。
傳真︰2623-9278
電郵︰