嘉里建設（683）重估物業價值，令今年頭4個月盈利減少11億元，被股壇長毛譏為想增加私有化成功機會。經紀黃話，呢件事冇令佢特別留意嘉里，反而覺得新亞置業（049）私有化行動隨時再推出。
新亞早排公布全年業績，股東應佔虧損有成7.818億元咁多，但股價從未受到影響，成交重大咗好多，好似噚日咁，就升咗2.38%，收3.225元，重係52周新高。
經紀黃表示，呢啲反常現象，絕對值得留意。不過小初心諗，新亞左撇右撇，就算真係私有化成功，個價都唔慌高得去邊，小股東未必有着數。
另外建美集團（851）噚日玩大插水，只見新記不問價將貨沽出，重要係沽極唔完咁嘅款，小初完全唔敢博反彈。回想多年前建美都叫做炒過吓，但神仙股始終打回原形。
呢系股票幕後人，近年似乎專心於娛樂圈發展，多過在股壇興風作浪，今次因乜事隻股會搞成咁，大家都無謂深究了。
慕容小初