勤拍戲懶出碟又扭計
陳少寶譏柏芝等錢開飯養家

張栢芝很久沒有出新碟，環球唱片高層陳少寶前晚接受訪問，言語間似乎頗不滿栢芝只顧拍電影，忽略歌唱事業。他又表示栢芝親友眾多，她是家中經濟支柱，難怪要拍戲搵快錢養家。

張栢芝自從與謝霆鋒情變後，近日似乎只顧玩樂，她所屬的環球唱片公司高層陳少寶前晚到新城娛樂台接受訪問，便暗寸栢芝因要養家開支大，只顧拍戲賺錢，忽略唱片工作。

「拍晒先度期啦」
問陳少寶是否打算力捧張敬軒或麥浚龍，他說：「兩個都捧，除非有啲好扭計、好唔得閒，你知我講邊個。」問陳少寶是否準備放棄栢芝，力捧黃伊汶？他說：「你叫栢芝拍戲，拍晒先度期啦。」
栢芝早前透露想明年出唱片，陳少寶說：「我冇同佢見過面，費事你哋寫我同佢冇聯絡，我同佢都好忙。」栢芝何時約滿環球？他說：「我唔係個個藝人個期都擺喺心，我諗佢○四年重係我嘅人。」

「人哋有嘢做嘛」
為何沒有為栢芝做宣傳，是否對她不滿？陳少寶說：「睇佢電影檔期先，人哋有嘢做嘛，唱片唔夠拍戲賺到錢。我一定唔係不滿佢，換轉係我有咁大頭家，都要做嘢開飯先，栢芝係明星多過歌星。」栢芝是家中重要經濟支柱，平時家人的開支都是由她負擔。
陳少寶又否認栢芝的緋聞會影響形象，他說：「談情說愛我唔可以阻止，我簽親嘅藝人都二十幾歲，個個青春活潑，唔可以唔畀佢哋談戀愛，佢哋會儍㗎，呢啲好正常。」
採訪、攝影：汪正文、娛樂突發組