全城大商場近排都爭相搞優惠，刺激市民消費，獎品愈嚟愈豐富，最實際梗係現金獎啦。今個禮拜五起到下個月24號，到旺角新世紀廣場，消費滿二百蚊（以單一發票計），就可以參加「即擲骰仔即中獎」遊戲，點數愈高，獎品愈豐富，包括五百蚊購物禮券。每個禮拜攞到點數最高嘅十名，可以進入「五百萬擲骰仔決賽篇」，擲到五個相同標誌，有機會攞到五十萬現金購物券，名額十個，每周送出兩個。
五十萬等於好多打工仔幾年嘅人工。商場大業主鬥大手筆送錢吸引消費者嘅遊戲，啱啱先至開始，應該會陸續有嚟。
另外，𠵱家到月底去尖沙嘴新太陽廣場商場，消費滿三百蚊或以上（最多兩張發票計），可以參加電腦遊戲，有機會贏一百蚊時裝現金券、時尚禮品、或飲食優惠等。
荃灣朗逸峯又有新樓書，驟眼睇同上個禮拜嗰本冇乜分別，打開先知加插咗介紹景觀嘅拉頁，有四十幾吋咁長，寫住「環迴美景，精采待續」，代表景觀要幾闊有幾闊。單單為咗推介個景觀，發展商就重新印製樓書咁浪費？長實黃思聰解話，新舊樓書嘅最大分別，唔止係拉頁咁簡單，而係加番個物業標誌，因為出舊樓書之前，三家發展商對物業標誌重未達成共識，𠵱家傾掂數咪再印過，順便加啲力度推介個靚景。另外，新晉歌星黃伊汶噚日去睇示範單位。
近期市場焦點青衣藍澄灣，買家對象以上車客為主，估唔到連投資者都有興趣，而且重係內地客㖭。美聯物業青衣區區域經理歐淼林話，一個喺北京住嘅內地客，專程落嚟用一百四十萬元，買咗個藍澄灣三座三十六樓A單位，面積六百三十八方呎，打算用嚟長線收租。佢又指出，𠵱家藍澄灣賣出嘅單位，有一半係投資者。
要裝備好自己至可以面對逆境挑戰，中原集團請嚟展能學院（香港）有限公司，搞咗個「龍騰飛躍」鍛煉營，畀主管級同事參加，透過訓練，認識自我同埋釋放內在潛能。
呢個七日六夜嘅鍛煉營，總共有五十個名額，中原佔二十個，餘下係其他公司，聽講電盈都有員工參加。每人收費八千八蚊。
中原話原本諗住畀代理參加，但反應一般，最後改為畀分行經理、區域經理同後勤部門主任級員工參加。
生意難做，令到好多代理心灰意冷，利嘉閣月會搵嚟心理學家顧修全講「推銷創富」，等代理可以積極主動啲。顧生以別開生面嘅方式做開場，就係畀個機會代理「搵錢」。
佢事先將共值一千蚊嘅二十蚊、五十蚊同一百蚊紙貼喺櫈底，叫在場近五百名代理去搵，重提水話高層施永青同何紹章櫈底實有。起初好多代理都唔信，後嚟見有人搵到，就起哄，差啲連施生個袋都摷埋。結果全場都好投入聽顧修全演講，內容主要係畀代理知要有正面嘅心態。
講開搵錢，恒基中半山富匯豪庭，最近賣咗個五千萬嘅單位，由美聯大圍分行嘅吳美蓮促成，為公司帶嚟一百萬佣金，自己就有三十萬落袋。
蘭西
電郵地址：
