李萬祺昨日獨自一人出現上環信德中心，似是往澳門。他表示剛過去的父親節有很大感慨，因這是他離婚後，首個父親節單獨與兩個女兒共度，他們在太平館吃飯，女兒還送上毛公仔。問到工作大計，李萬祺表示未有着落。
李萬祺與余安安今年二月離婚後，余安安積極參與幕前工作，更接拍了張衛健的《功夫足球》一劇，李萬祺則未見有新動向。
昨日下午四時左右，記者發現李萬祺獨自一人出現上環信德中心，他衣着casual，身形較前胖了少許，似欲往澳門，他甫見記者，邊急步邊說：「我唔想接受訪問。」
後來商場的保安上前，李萬祺即向保安說：「你哋幫手攔開佢哋。」不過當李萬祺見保安與記者發生輕微推撞，他即心軟企定定接受訪問。
問李萬祺剛過去的父親節如何度過？他說：「好大感慨呀，係第一次得三個人過父親節。嗰日我同兩個女去太平館食飯，我埋單嘅，兩個女就送咗個毛公仔畀我。」他表示與兩個女兒談及學業情況，亦有提及前妻余安安，他說：「我同對女重好close㗎，每個星期都通五、六次電話。」
問李萬祺兩個女兒的撫養權是不是歸余安安？他說：「冇咁複雜嘅，總之佢哋係跟媽咪住，但係我想幾時見佢哋都得。」
再問李萬祺的工作大計，他說：「暫時未有呀，我都努力咗好耐㗎啦，對上都係以顧問形式喺公關公司做嘢，如果工作有需要，就會返內地囉。」
記者指李萬祺神情相當輕鬆，他笑說：「外表輕鬆啫。」最後問他是否支持前妻余安安復出拍戲？他即高聲說：「支持呀。」
採訪、攝影：DebbieLum