早幾日，亞Mark趁住SARS疫潮有緩和趨勢，兼且響應番政府刺激消費嘅呼籲，周末同班朋友走咗去澳門玩。雖然澳門個觀光塔已經唔係甚麼新景點，但相對於唔容易放假嘅亞Mark嚟講，卻是今趟首選嘅地方；但最意想不到嘅，會係甫踏進觀光塔大樓內，亞Mark嘅目光竟給熱烘烘場面所吸引住。細看下，原來係澳門起亞（Kia）代理，正替部全新Sorento新一代CitySUV搞大型車展；往日，只會響香港新車展銷會出現嘅墟冚場面，經已不復見，反而香港人一直看不起嘅澳門市場，卻變得欣欣向榮、前景樂觀，當場倒真的令亞Mark有無數疑惑湧上心頭。香港政府以「殺雞取卵」嘅低招苛收汽車首次登記稅，未見其利先見其弊；而當疫潮過後，若然個人薪俸稅並無任何寬減的話，試問又怎樣刺激消費同振興香港經濟呢？莫非呢啲都只係亞Mark「膚淺」嘅想法？