香港失業率創8.3%新高的同時，港股衝破1萬點，創出1年新高，似乎牛氣十足。唔知邊個高人諗出炒股救港呢一招？過往港股當旺時，好多人唔返工去炒股，既然炒股搵到錢，又何愁冇工做，高失業率又有乜所謂？如果電盈（008）升回5合1前10元水平，好多股民會爭住消費，唔使政府賣廣告叫人消費。如果有人順手炒高埋樓市，就確係功德無量，香港人魚翅撈飯的日子可重臨。
讀者唔好怪趙飛雲講嘢酸溜溜，因為吃不到的葡萄原來真係好酸。噚日左摷右摷終於搵到粒小葡萄──太平洋恩利（1174），趙飛雲以平均價1.10元買入10萬股。恩利噚日升3.7%，收1.12元，技術初現突破，輕微升破3月21日至今的頭肩底頸線1.11元，短期首個目標2月頂部1.17元至1.21元，頭肩底量度升幅1.43元，可作中線目標。短炒以20日線1.06元作止蝕位。
恩利去年12月公布中期業績（截至9月），純利增長10.5%，由於歐洲市場解禁，預期下半年會有更佳表現，高層曾表示希望每年維持兩成盈利增長，以現價往績PE9.2倍計，應有不俗上升空間。
海域（1220）收1.40元，升2.2%，10日線開始轉跌為升，噚日在1.39元買多5萬股，短炒計數位推上1.34元。
趙飛雲