大市高位爭持，恒指升6點，短期仍屬反覆向好之局，整固完成後，可向10000至10247水平推進。噚日國企股高開低收，有單日轉向格局，近期升得太急，短期內出現調整，係好正常之事，消化一吓，又會再上過。
噚日大成交榜上有好多新面孔，最引人注目就係排第5位嘅華晨中國（1114），成交1.38億股，總值2.75億元，第6同第8位分別係馬鋼（323）同中石化（386），佢哋嘅成交比大藍籌新地（016）重要多。講番華晨，呢隻係基金成份組合好重嘅基金股，噚日咁大成交（起碼係過去兩年多以來嘅高紀錄），好明顯係基金又再有所動作，唔排除佢哋（唔止一個基金）繼續增持。
睇番走勢，由2月中開始，華晨形成一個大型頭肩底，頸線在2.025元，噚日衝上2.05元後回收1.99元，在頸線受阻，短期或會略作整固，若破位而上，照度上去，目標直指2.45元。噚日咁大成交，破位而升的機會極大。
摩根大通揸住華晨4.14億股（佔發行股數11.3%），係基金中揸得最重者，其他嘅唔超過5%，不用宣布）。除咗4月1日宣布已揸住的2.05億股外，之後再增持的2億股平均價係在1.85至1.9元之間，以保守利潤40%計，華晨半年目標價為2.7元。
講到基金股，好多時基金為咗種種理由，會同短線跟風客捉吓迷藏，甚至可能會震吓倉，喺基金重係收集期間，沽家嗰便嘅陣容會好墟冚，「些那」掛到MM聲，到收集完成，大升之時，沽壓頓時會大減。有一個例子，就係隻第一太平（142），在八毫幾九毫子之時，好明顯係基金在收集，「些那」個個位都成七、八球，嚇倒唔少人，但一踢上去，「些那」立即唔見咗大半，家吓一太股價已經上到1.3元水平。所以，買華晨要以中線為出發點，2.0元水平入市，希望年底2.5元獲利回吐。
華晨到4月底止，銷售客車逾2.5萬輛，升30%，及中華轎車1.1萬輛（去年8月才推出），有信心可達今年客車7萬輛及轎車3萬輛的目標，今年盈利料增50%，每股盈利25仙，明年寶馬車系投產，盈利料再增30%，預測PE僅6倍。基金重貨，必有智珠在握。
郭兆誠