有位寶島女星𠵱家都幾慘，佢好多年前嚟到香港發展，以佢嘅美貌，當然好快就走紅，佢一心諗住可以喺香港釣金龜婿，點知次次都係分手收場。後尾佢返到寶島，以為可以同行咗好多年嘅男友過埋下半世，點知嗰個男人一樣靠唔住，最終離婚。
不過寶島女星同嗰個男人幾年前已經生咗個仔，佢唔想俾人知，所以將個仔交畀喺加拿大嘅親友照顧。其實佢都唔想個仔阻住佢搵食，因為近年佢事業發展麻麻，重又學人炒股票，結果損手爛腳，周圍問人借錢，有個唯美導演就借過幾十萬畀佢，但始終唔夠。寶島女星惟有搵人介紹佢喺香港識老闆，𠵱家有個內地老闆睇中佢，喺香港半山租咗個單位畀佢住同畀錢佢使。
韓國變性人河利秀噚日喺台灣出席節目《台灣拯人王》，佢被安排同一班整形嘅女星好似顧婕同凌威威等一齊做訪問。
河利秀噚日就好寸，佢好嫌棄同班整形女星一齊影相。馮仁昭覺得河利秀咁樣好似好唔尊重人哋，其實人哋都唔嫌佢變性啦！
黃凱芹噚日好鬼勞氣，皆因佢上個禮拜六聽到一個電台節目，嘉賓陳海琪話黃凱芹用餅錄音帶飛佢，佢就掟隻黑膠碟還擊。黃凱芹聽完之後，真係把幾火，佢即刻打電話去港台投訴，要求港台刪咗呢段錄音。佢話：「呢個都唔係事實，我覺得佢咁講係嚴重影響我形象，我希望港台還我公道，第一我唔打人，第二我更加唔打女人。」
陳慧琳（Kelly）噚日去港台做訪問，Kelly話佢全家人都已經同佢喺山頂嗰個蠟像影晒合照，佢爸爸重犀利到講到個蠟像同佢真人有乜嘢唔同，連佢都忍唔住要讚吓佢爸爸。問Kelly怕唔怕個蠟像好似外國嗰啲明星蠟像咁俾人摸到蝕晒，佢話：「咁摸個蠟像都好過摸我嘛！」
汪明荃噚日喺黃埔開記招，宣布佢嘅演唱會將會喺下個月喺紅館加開兩場。對於日前張慧儀疑俾未婚夫霍紹裘打，阿姐話：「無論點打人係唔啱，女人點夠男人打呀，乜咁惡劣嘅。」而阿Lam早前喺阿姐嘅演唱會度跌傷，阿姐話：「今次我會快啲畀利是嘉賓。而阿Lam𠵱家瘀血未散，有一邊耳仔聽得唔係咁好。」
