靚女賓架自沙士爆發後，似乎覺悟到人生重要，每日最好笑一笑，凡事留有餘地總是好。呢日靚女賓架又自新加坡傳來電郵，介紹一個網上笑話：美國電視大牌女主持巴巴拉華特絲喺波斯灣戰爭爆發前，做過一連串節目，探討科威特女性地位，當時佢發覺科威特女人行街，總係跟住丈夫十呎之後，不敢超越。近排華特絲又返去科威特做訪問，發覺女人行在丈夫十呎之前，不禁大喜過望，捉住一位女士訪問：「太好了，為甚麼科威特女人可以爭取到與男人互換角色，不再卑微？」科威特女人答：「因為現在有地雷。」
靚女賓架以前曾在美資銀行工作，自然冇人敢歧視，升到做部門董事。某年親自到漢城見客，點知啲南韓公司高層（全部男性）接見佢嘅時候，笑容甚為勉強，對佢眼望望，總之唔係好合作，後來佢知道原因，南韓企業係男人世界，管理人心中容不下一位來自香港嘅女賓架對佢哋指揮、質詢、問難也。左丁山有一位南韓同學，讀書時經常上街示威，與警察對打，畢業後就安於做打工一族，為人斯文有禮，但對老婆就鍾意發號施令，問佢點解，佢話："Mywifeismyproperty"
當然香港女性威猛到極，手袋黨橫行中環，女權狀況與南韓、日本、科威特相差太遠，所以左丁山好唔明白，點解久唔久重有人話香港存在女性歧視？