非典受控後，住宅交投增多，豪宅表現突出，中原西半山區高級營業董事何兆棠話，好似5月份，旗下五個代理同一個主管，夾埋總共做咗超過一億元成交，所以最近佢同港島區董事唐秉正（圖一左三），就請呢六個同事去山頂凌霄閣食晚飯，順便傾吓下半年嘅銷售大計。
何兆棠話，下半年會主力做優質大手豪宅買賣，目標係長線投資者、機構客戶同埋基金公司等。要求代理凡新盤都要帶客去睇，除咗買賣資料外，其他嘅資訊都要不時話畀啲客知，希望做到一條龍服務。重有係要代理識多國語言，總之就係要做到全能。睇嚟真係冇番咁上下都做唔到豪宅線，起碼要係萬能俠至得。
講番中記上個月做嘅成交，原來有一位客係內地將嚟港上市嘅民企，用咗三千幾萬買咗兩個畢架山一號、五個海堤灣畔同一啲散單位。呢間民企計劃動用近八千萬買物業，𠵱家就傾緊幾間貝沙灣。另一個中港商人就買咗間趙苑，價值二千萬。
𠵱家搵食艱難，做經紀嘅除對客人要千依百順，最緊要務實，不過仍有人不思進取。蘭西最近聽到一位讀者投訴，話說佢睇中個幾年都賣唔出嘅銀主盤，於是搵代理帶去睇樓，經紀話要一百四十幾萬至買到，但喺集團另一間行就話百二萬有交易。
讀者重話，代理先畀一個質素好差嘅吉屋佢睇，跟住再睇另一個質素好啲嘅單位，但後者嘅價錢就貴好多。重有就係之前話可以收少啲佣，後來又話要收足一個佣。讀者見佢咁唔老實，決定幫趁第間代理行。個代理真係偷雞唔到蝕把米。
啱啱過去嘅父親節，好多商場都提供優惠吸引消費者，信和大角嘴奧海城商場，就錄到近十五萬人次，係舊年直播世界盃以嚟嘅新高。個場除咗請藝人表演，搬埋藍灣半島商場隻全球最大嘅兔公仔過嚟，重有真人音樂盒同互動小丑遊戲㖭。
聽信和講，商場引入近三四年喺英美大行其道嘅「主題式創藝消費」，即係將消費同娛樂集於一身。英美搞呢個概念係用嚟對抗網上購物潮。
另外，信和嘅屯門黃金海岸商場，喺父親節搞咗個慈善車展，只要捐出二十蚊或以上，就可以同古董車合照，今個禮拜日就有古董Mini-Cooper展出。
𠵱家賣樓，發展商除咗密集式宣傳攻勢外，電視廣告片都好重要。唔少樓盤喺電視賣廣告，都大收宣傳效用，尤其首廣告音樂，觀眾一聽，就知係邊個盤。
長實今個禮拜四就會喺電視首播荃灣朗逸峯廣告，佢哋強烈推介首廣告歌，話包保一聽就鍾意。
噚日傳媒率先睇咗段片，分兩個版本，每段三十秒，首歌都幾好聽，聽講係本地創作。
啱啱封盤嘅畢架山一號，長實喺「沙士」前開賣，三個幾月就賣咗成二百七十幾間，單係佣金銀碼都唔細。美聯物業就喺同業中，贏得長途賽冠軍，佣金跳升至全行最高嘅2.35%，行內就叫到達Bar頂。此外，剛加盟美聯科技部嘅猛人馮浩陞，據聞，曾效力PCCW同和黃，加盟前重喺政府嘅政務司司長辦公室，做綜合電話查詢中心負責人。
蘭西
電郵地址：